4 days ago
4
ARTICLE AD BOX
ନୂଆଦିଲ୍ଲୀ: ନୂଆଦିଲ୍ଲୀର ଜନ୍ତରମନ୍ତରଠାରେ କକ୍ରୋଚ ଜନତା ପାର୍ଟି (ସିଜେପି) ନେତୃତ୍ବରେ ଜୁଲାଇ ୨୦ ତାରିଖରେ ‘ସଂସଦ ଚଲୋ’ ଆନ୍ଦୋଳନ ସମୟରେ ପ୍ରତିବାଦ କରୁଥିବା ଛାତ୍ରମାନଙ୍କ ଉପରେ ପେଲେଟ୍ ଗନ୍ରେ ଆକ୍ରମଣକୁ ନେଇ ବିବାଦ ତୀବ୍ର ହୋଇଛି। ସଂସଦରେ ଏହାର ଗଭୀର ପ୍ରଭାବ ଦେଖିବାକୁ ମିଳିଛି। ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ନେତୃତ୍ବରେ ବିରୋଧୀ ଦଳମାନେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କଠାରୁ ଜବାବ ମାଗୁଥିବାବେଳେ ସଂସଦ ଚାଲି ପାରୁନାହିଁ।
ଏହି ପରିପ୍ରେକ୍ଷୀରେ କେନ୍ଦ୍ରୀୟ ରିଜର୍ଭ ପୁଲିସ ଫୋର୍ସ (ସିଆର୍ପିଏଫ୍) ମୁଖ୍ୟ ସୁରକ୍ଷାକର୍ମୀଙ୍କ ସପକ୍ଷରେ ବାହାରିଛନ୍ତି। ସିଆର୍ପିଏଫ୍ ମହାନିର୍ଦ୍ଦେଶକ ଜ୍ଞାନେନ୍ଦ୍ର ପ୍ରତାପ ସିଂହ ସୁରକ୍ଷାକର୍ମୀଙ୍କୁ ନିର୍ଭୟରେ କାମ କରିବାକୁ କହିଛନ୍ତି। ସେମାନଙ୍କୁ ଆଶ୍ୱାସନା ଦେବା ସହିତ ସେମାନଙ୍କ କାର୍ଯ୍ୟର ଦାୟିତ୍ୱ ନେବେ ବୋଲି କହିଛନ୍ତି। ଜୁଲାଇ ୨୭ ତାରିଖରେ ଅନୁଷ୍ଠିତ ସିଆର୍ପିଏଫ୍ର ପ୍ରତିଷ୍ଠା ଦିବସ ଉତ୍ସବରେ ଭାଷଣ ଦେଇ ଜ୍ଞାନେନ୍ଦ୍ର ପ୍ରତାପ ସିଂହ କହିଛନ୍ତି, ତୁମେ ତୁମର କର୍ତ୍ତବ୍ୟର ସଚ୍ଚୋଟ ପାଳନ ପାଇଁ ଯାହା ନିଷ୍ପତ୍ତି ଓ କାର୍ଯ୍ୟ କରିବ, ମୁଁ ତାହାର ଦାୟିତ୍ୱ ନେବି। ସୁରକ୍ଷା ବାହିନୀକୁ ନିର୍ଭୟରେ କର୍ତ୍ତବ୍ୟ ପାଳନ କରିବାକୁ ପରାମର୍ଶ ଦେବା ସହିତ, ଦାୟିତ୍ୱ ନିର୍ବାହ କରିବା ସମୟରେ ସଂକୋଚ କର ନାହିଁ ବୋଲି କହିଛନ୍ତି। ଯେଉଁଠାରେ ଦାୟିତ୍ୱ କିମ୍ବା ଉତ୍ତରଦାୟିତ୍ୱ ନେବାକୁ ପଡିବ, ମୁଁ ସିଆର୍ପିଏଫ୍ର ମହାନିର୍ଦ୍ଦେଶକ ଭାବରେ ଏହାକୁ ଗ୍ରହଣ କରିବି ବୋଲି ଜ୍ଞାନେନ୍ଦ୍ର ପ୍ରତାପ କହିଛନ୍ତି।
