5 days ago
2
ARTICLE AD BOX
କୋଲକାତା: ପଶ୍ଚିମବଙ୍ଗରେ ରାଜନୈତିକ ଉତ୍ତେଜନା ମଧ୍ୟରେବିଜେପିକୁ ଟାର୍ଗେଟ କରି ବର୍ଷିଛନ୍ତି ମମତା ବାନାର୍ଜୀ। ତାଙ୍କ ପୁତୁରା ତଥା ତୃଣମୂଳ କଂଗ୍ରେସ (ଟିଏମ୍ସି) ସାଂସଦ ଅଭିଷେକ ବାନାର୍ଜୀଙ୍କ ବାସଭବନ ଉପରେ ଆକ୍ରମଣ ଓ କୋଲକାତାର କାଳୀଘାଟ ଅଞ୍ଚଳରେ କାଳୀପୂଜା ଆୟୋଜନରେ ବାଧା ଦିଆଯାଉଥିବା ଅଭିଯୋଗ କରି ସେ ବିଜେପି ସରକାରଙ୍କୁ କଡ଼ା ସମାଲୋଚନା କରିଛନ୍ତି।
ଅଭିଷେକଙ୍କୁ ଭେଟିବା ପରେ ଗଣମାଧ୍ୟମକୁ ସମ୍ବୋଧନ କରି ମମତା କହିଛନ୍ତି, ତୁମେ କେତେ ସାହସୀ ମୁଁ ଦେଖିବି, ମୋ ଛାତି ଉପରେ ବୁଲଡୋଜର ଚଳାଇ ଦେଖ। ମୁଁ ତୁମ ସାମ୍ନାରେ ଠିଆ ହୋଇଛି। ଏହି ମନ୍ତବ୍ୟ ଜରିଆରେ ସେ ବିଜେପିକୁ ସିଧାସଳଖ ଆହ୍ୱାନ ଦେଇଛନ୍ତି। ଅଭିଷେକ ବାନାର୍ଜୀଙ୍କ ଅଭିଯୋଗ ଅନୁସାରେ, ନଭେମ୍ବର ୭ ତାରିଖ ରାତି ପ୍ରାୟ ୨ଟାରେ କାଳୀଘାଟ ରୋଡ୍ସ୍ଥିତ ତାଙ୍କ ବାସଭବନ ଉପରେ ବିଜେପି ସମର୍ଥିତ କିଛି ଦୁର୍ବୃତ୍ତ ଆକ୍ରମଣ କରିଥିଲେ। ଏହା ପୂର୍ବରୁ ଦୁଇ ଦିନ ଧରି ତାଙ୍କ ଘର ଉପରେ ନଜର ରଖାଯାଇଥିବା ସେ କହିଛନ୍ତି।
ଅଭିଷେକ ବାନାର୍ଜୀଙ୍କ ଅଭିଯୋଗ
ଅନ୍ୟପକ୍ଷରେ, କାଳୀଘାଟ ଅଞ୍ଚଳରେ ପାରମ୍ପରିକ କାଳୀପୂଜା ଆୟୋଜନକୁ ବାଧା ଦିଆଯାଉଥିବା ମମତା ଅଭିଯୋଗ କରିଛନ୍ତି। ଦୀର୍ଘଦିନ ଧରି ଆୟୋଜିତ ହୋଇଆସୁଥିବା କିଛି ପୂଜା ପାଇଁ ଅନୁମତି ରଦ୍ଦ କରାଯାଇଥିବା ବେଳେ ନୂଆ କରି ଆୟୋଜନ ହେଉଥିବା ଗୋଟିଏ ପୂଜାକୁ ମୁଖ୍ୟ ରାସ୍ତାରେ କରିବାକୁ ଅନୁମତି ମିଳିଥିବା ସେ କହିଛନ୍ତି। ଏହାଦ୍ୱାରା ପାରମ୍ପରିକ ପୂଜା ଆୟୋଜନ ଓ ଶୋଭାଯାତ୍ରା ପ୍ରଭାବିତ ହେଉଥିବା ତାଙ୍କ ଅଭିଯୋଗ। ସ୍ଥାନୀୟ କ୍ଲବ୍ଗୁଡ଼ିକୁ ମଧ୍ୟ ସେମାନଙ୍କ କାର୍ଯ୍ୟକ୍ରମ କରିବାରୁ ରୋକାଯାଉଥିବା ସେ କହିଛନ୍ତି। କାଳୀପୂଜା ଓ ଦୀପାବଳି ପୂର୍ବରୁ ଏଭଳି ବାଧା ସୃଷ୍ଟି କରିବାର ଉଦ୍ଦେଶ୍ୟ କ’ଣ ବୋଲି ମମତା ପ୍ରଶ୍ନ କରିଛନ୍ତି।
