3 weeks ago
10
ARTICLE AD BOX
କୋଲକାତା: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ବିମାନ ଯାତ୍ରାକୁ ନେଇ ନୂଆ ବିବାଦ ସୃଷ୍ଟି ହୋଇଛି। ତୃଣମୂଳ କଂଗ୍ରେସ (ଟିଏମ୍ସି)ର ପାଣ୍ଠିରେ କିଣାଯାଇଥିବା ଏକ ବିଳାସପୂର୍ଣ୍ଣ ବିମାନ ଓ ଏକ ହେଲିକପ୍ଟରକୁ ମମତା ଭଡ଼ାରେ ବ୍ୟବହାର କରୁଥିବା ଅଭିଯୋଗ ଉଠାଇଛି ବିଜେପି। ଏହାକୁ ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଥିବାବେଳେ ଟିଏମ୍ସି ପକ୍ଷରୁ ସମସ୍ତ ଅଭିଯୋଗକୁ ଖଣ୍ଡନ କରାଯାଇଛି।
ଖବର ଅନୁସାରେ, ଟିଏମ୍ସି ଦଳୀୟ ପାଣ୍ଠିରେ ବିଳାସପୂର୍ଣ୍ଣ ବିମାନ କିଣିଥିଲା। ତେବେ ସେହି ବିମାନରେ ଯାତ୍ରା କରିବା ପାଇଁ ମମତା ବାନାର୍ଜୀଙ୍କ କାର୍ଯ୍ୟାଳୟ ପକ୍ଷରୁ ପୁଣି ଭଡ଼ା ବାବଦରେ ଅର୍ଥ ପ୍ରଦାନ କରାଯାଉଥିବା ଦାବି କରିଛି ବିଜେପି। ଦଳର ପ୍ରଶ୍ନ ହେଉଛି, ଯେଉଁ ବିମାନ ଦଳର ଅର୍ଥରେ କିଣାଯାଇଛି, ସେହି ବିମାନ ପାଇଁ ପୁଣି ଭଡ଼ା କାହିଁକି ଦିଆଯାଉଛି ଏବଂ ଏହି ଅର୍ଥ କାହା ପାଖକୁ ଯାଉଛି।
ବିଜେପିର ଅଭିଯୋଗ ହେଉଛି, ଏହି ସମଗ୍ର ବ୍ୟବସ୍ଥାରେ ସ୍ୱଚ୍ଛତାର ଅଭାବ ରହିଛି। ବିମାନ କିଣିବାର ଖର୍ଚ୍ଚ, ଏହାର ମାଲିକାନା, ପରିଚାଳନା ଓ ଭଡ଼ା ବାବଦରେ ଦିଆଯାଉଥିବା ଅର୍ଥର ସମ୍ପୂର୍ଣ୍ଣ ବିବରଣୀ ସାର୍ବଜନୀନ କରିବାକୁ ଦଳ ଦାବି କରିଛି। ବିଜେପି ଏହାକୁ ଜନସାଧାରଣଙ୍କ ଟଙ୍କାର ଅପବ୍ୟବହାର ସହ ଜଡ଼ିତ ପ୍ରସଙ୍ଗ ବୋଲି ମଧ୍ୟ କହିଛି।
West Bengal Politics: ମମତା ବାନାର୍ଜୀଙ୍କ ପରାଜୟ ପରେ ଟିଏମ୍ସିରେ ବଡ଼ ଧରଣର ଫାଟ
ଅନ୍ୟପଟେ ଟିଏମ୍ସି ଏହି ଅଭିଯୋଗକୁ ସମ୍ପୂର୍ଣ୍ଣ ଭିତ୍ତିହୀନ ବୋଲି କହିଛି। ଦଳର ସଫେଇ ଅନୁସାରେ, ବିମାନଟିର ପରିଚାଳନା ଏକ ପୃଥକ୍ ସଂସ୍ଥା ମାଧ୍ୟମରେ କରାଯାଉଛି। ସେଥିପାଇଁ ଏହା ବ୍ୟବହାର କରାଯିବା ବେଳେ ନିର୍ଦ୍ଧାରିତ ପ୍ରକ୍ରିୟା ଅନୁଯାୟୀ ଅର୍ଥ ପ୍ରଦାନ କରାଯାଉଛି। ଏଥିରେ କୌଣସି ଅନିୟମିତତା ନାହିଁ ବୋଲି ଟିଏମ୍ସି ସ୍ପଷ୍ଟ କରିଛି। ଏହି ପ୍ରସଙ୍ଗକୁ ନେଇ ଉଭୟ ଦଳ ପରସ୍ପର ବିରୋଧରେ ଆକ୍ରମଣ ଜାରି ରଖିଛନ୍ତି। ବିଜେପି ଏହାର ନିରପେକ୍ଷ ତଦନ୍ତ ଦାବି କରୁଥିବାବେଳେ ଟିଏମ୍ସି କହିଛି, ରାଜନୈତିକ ଫାଇଦା ପାଇଁ ଏଭଳି ଅଭିଯୋଗ କରାଯାଉଛି। ଏହି ବିବାଦ ଆଗାମୀ ଦିନରେ ପଶ୍ଚିମବଙ୍ଗର ରାଜନୀତିରେ ଆହୁରି ଚର୍ଚ୍ଚାର ବିଷୟ ପାଲଟିବ ବୋଲି ମନେ କରାଯାଉଛି।
