3 weeks ago
11
ARTICLE AD BOX
ଅକଲାଣ୍ଡ: ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ସମ୍ପର୍କ ଏକ ଐତିହାସିକ ମୋଡ଼ରେ ପହଞ୍ଚିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୪୦ ବର୍ଷ ମଧ୍ୟରେ ନ୍ୟୁଜିଲାଣ୍ଡ ମାଟିରେ ପାଦ ଦେଇଥିବା ପ୍ରଥମ ଭାରତୀୟ ପ୍ରଧାନମନ୍ତ୍ରୀ ହୋଇ ଇତିହାସ ସୃଷ୍ଟି କରିଛନ୍ତି। ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ କ୍ରିଷ୍ଟୋଫର ଲକ୍ସମଙ୍କ ସହିତ ଅକଲାଣ୍ଡରେ ଭାରତ-ନ୍ୟୁଜିଲାଣ୍ଡ ବ୍ୟବସାୟ କାର୍ଯ୍ୟକ୍ରମରେ ଅଂଶଗ୍ରହଣ କରି, ପ୍ରଧାନମନ୍ତ୍ରୀ ମୋଦୀ ଦୁଇ ଦେଶ ମଧ୍ୟରେ ବାଣିଜ୍ୟ ଏବଂ ରଣନୈତିକ ସମ୍ପର୍କ ବିଷୟରେ ଅନେକ ବଡ଼ ଘୋଷଣା କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, ଆଜିର ଭାରତ କେବଳ ଏକ ବଜାର ନୁହେଁ, ବରଂ ଏହା ବିଶ୍ୱ ଅଭିବୃଦ୍ଧି ପାଇଁ ଏକ ସୁଦୃଢ଼ ଲଞ୍ଚପ୍ୟାଡ୍ ପାଲଟିଛି।
ଦୁଇ ଦେଶ ମଧ୍ୟରେ ଐତିହାସିକ ବାଣିଜ୍ୟ ଚୁକ୍ତିନାମାକୁ ପ୍ରଶଂସା କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଭାରତ ଏବଂ ନ୍ୟୁଜିଲାଣ୍ଡ ମାତ୍ର ନଅ ମାସର ରେକର୍ଡ ସମୟ ମଧ୍ୟରେ ମୁକ୍ତ ବାଣିଜ୍ୟ ଚୁକ୍ତିନାମା(ଏଫଟିଏ)କୁ ସମାପ୍ତ କରିଛନ୍ତି। ଏହା ସମ୍ଭବତଃ ବିଶ୍ୱରେ ପ୍ରଥମ ଥର ପାଇଁ ଏକ ଏଫଟିଏ ଏତେ ଶୀଘ୍ର କାର୍ଯ୍ୟକାରୀ ହୋଇଛି। ଏହି ଚୁକ୍ତିନାମା ଦୁଇ ଦେଶ ମଧ୍ୟରେ ବ୍ୟବସାୟ ପାଇଁ ବଜାର ପ୍ରବେଶ, ନିବେଶ, ସେବା, ପ୍ରଯୁକ୍ତିବିଦ୍ୟା ଏବଂ ପ୍ରତିଭା ଗତିଶୀଳତା ପାଇଁ ନୂତନ ଦ୍ୱାର ଖୋଲିବ। ଏହି ଚୁକ୍ତିନାମା ଆଧାରରେ, ୨୦୩୦ ସୁଦ୍ଧା ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ପାରସ୍ପରିକ ବାଣିଜ୍ୟ ଦ୍ୱିଗୁଣିତ ହେବ।
ବ୍ୟବସାୟିକ କାର୍ଯ୍ୟକ୍ରମରେ ଗୁରୁତ୍ୱାରୋପ
ବ୍ୟବସାୟିକ କାର୍ଯ୍ୟକ୍ରମରେ ଗୁରୁତ୍ୱାରୋପ କରାଯାଇଥିଲା ଯେ, ଦୁଇ ଦେଶ ମଧ୍ୟରେ ଏହି ସହଯୋଗ ପାରସ୍ପରିକ ବୁଝାମଣା ଏବଂ ବିଶ୍ୱାସ ଉପରେ ଆଧାରିତ। ନ୍ୟୁଜିଲାଣ୍ଡ ଆଗାମୀ ୧୫ ବର୍ଷ ମଧ୍ୟରେ ଖାଦ୍ୟ ପ୍ରକ୍ରିୟାକରଣ ଠାରୁ ଆରମ୍ଭ କରି ବୟନଶିଳ୍ପ ପର୍ଯ୍ୟନ୍ତ ଭାରତର ୧୪ ସେକ୍ଟରରେ ୨୦ ବିଲିୟନ ଡଲାର ନିବେଶ କରିବାକୁ ପ୍ରତିଶ୍ରୁତି ଦେଇଛି। ଭାରତର ନୀତି ଏବଂ ରାଜନୈତିକ ସ୍ଥିରତା ଏବଂ ଏହାର ନିରନ୍ତର ଅଭିବୃଦ୍ଧିକୁ ଦୃଷ୍ଟିରେ ରଖି, ଏହି ନିବେଶ ଉଭୟ ଦେଶର ଅର୍ଥନୀତିକୁ ନୂତନ ଗତି ପ୍ରଦାନ କରିବ। ଭାରତର ଆର୍ଥିକ ଶକ୍ତି ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଆଜି ଭାରତ ବିଶ୍ୱର ତୃତୀୟ ସର୍ବବୃହତ ଘରୋଇ ବିମାନ ଚଳାଚଳ ବଜାରରେ ପରିଣତ ହୋଇଛି। ସେ କହିଥିଲେ ଯେ ସେ ଭାରତର ୧୪୦ କୋଟି ଲୋକଙ୍କ ଆକାଂକ୍ଷା ଏବଂ ସ୍ୱପ୍ନର ବାର୍ତ୍ତା ନେଇ ମୁଁ ନ୍ୟୁଜିଲାଣ୍ଡ ଆସିଛି। ପ୍ରଧାନମନ୍ତ୍ରୀ ମୋଦୀ କହିଛନ୍ତି, ଭାରତୀୟ ସଭ୍ୟତା ଏବଂ ନ୍ୟୁଜିଲାଣ୍ଡର ପାରମ୍ପରିକ ମାଓରି ସଂସ୍କୃତି ଗଭୀର ଭାବରେ ଜଡିତ, ଏବଂ ସେଥିପାଇଁ ଏହି ଐତିହାସିକ ଏଫଟିଏରେ ମାଓରି ପରମ୍ପରାକୁ ଏକ ସ୍ୱତନ୍ତ୍ର ସ୍ଥାନ ଦିଆଯାଇଛି।
