1 day ago
2
ARTICLE AD BOX
ନିୟନ୍ତ୍ରଣରୁ ପୁନରୁଦ୍ଧାର ପର୍ଯ୍ୟନ୍ତ
ଭୁବନେଶ୍ବର(ଅମଳିନ ପଟ୍ଟନାୟକ): ସବୁଜ ଭବିଷ୍ୟତ ଗଢ଼ିବାରେ ଓଡ଼ିଶା ପ୍ରଦୂଷଣ ନିୟନ୍ତ୍ରଣ ବୋର୍ଡ଼ର ଭୂମିକା ସେପ୍ଟେମ୍ବର ୧୪ ପ୍ରତିଷ୍ଠା ଦିବସ ଅବସରରେ ଚାରି ଦଶନ୍ଧିର ପରିବେଶ ସୁରକ୍ଷା, ପ୍ରଯୁକ୍ତିଗତ ନବସୃଜନ ଓ ସ୍ଥାୟୀ ବିକାଶର ଏକ ସମୀକ୍ଷା।
ଚାରି ଦଶନ୍ଧିର ପରିବେଶ ପ୍ରହରା
୧୯୮୩ରେ ଗଠିତ ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ଼ ଆଜି କେବଳ ଅନୁମତି କିମ୍ବା ଯାଞ୍ଚକାରୀ ସଂସ୍ଥା ନୁହେଁ; ବିଜ୍ଞାନ, ତଥ୍ୟ, ପ୍ରଯୁକ୍ତି ଓ ଜନସହଭାଗିତା ଆଧାରିତ ସ୍ୱଚ୍ଛ ବିକାଶର ସହଯୋଗୀ। ଭୁବନେଶ୍ୱର ମୁଖ୍ୟାଳୟ, ୧୪ଟି ଆଞ୍ଚଳିକ କାର୍ଯ୍ୟାଳୟ ଏବଂ କେନ୍ଦ୍ରୀୟ ପରୀକ୍ଷାଗାର, ପଟିଆ ହିଁ ରାଜ୍ୟର ପ୍ରମାଣଭିତ୍ତିକ ପରିବେଶ ନିଷ୍ପତ୍ତିକୁ ସୁଦୃଢ଼ କରୁଛି।
ପ୍ରଯୁକ୍ତି ଓ ସତର୍କତାରେ ସ୍ୱଚ୍ଛ ବାୟୁ
୧୮ଟି ନିରନ୍ତର ବାୟୁ ଗୁଣବତ୍ତା କେନ୍ଦ୍ର, ୨୧ଟି ସହରର ୫୯ଟି ମାନୁଆଲ କେନ୍ଦ୍ର ଏବଂ ଜିଲ୍ଲାସ୍ତରୀୟ ପର୍ଯ୍ୟବେକ୍ଷଣ ଦ୍ୱାରା ପ୍ରଦୂଷଣ ପ୍ରବଣତା ଶୀଘ୍ର ଚିହ୍ନଟ ହେଉଛି। ଜାତୀୟ ସ୍ୱଚ୍ଛ ବାୟୁ କାର୍ଯ୍ୟକ୍ରମର ସମନ୍ୱିତ ପଦକ୍ଷେପ ଫଳରେ ସ୍ୱଚ୍ଛ ବାୟୁ ସର୍ବେକ୍ଷଣ ୨୦୨୫ରେ ଅନୁଗୁଳ ତୃତୀୟ ଓ ଭୁବନେଶ୍ୱର ଚତୁର୍ଥ ସ୍ଥାନ ପାଇଛି।
ନଦୀ, ସମୁଦ୍ର ଓ ଜଳସମ୍ପଦର ପୁନରୁଦ୍ଧାର
ଜାତୀୟ ଜଳ ନିରୀକ୍ଷଣ କାର୍ଯ୍ୟକ୍ରମରେ ୩୮୮ଟି ସ୍ଥାନର ନମୁନା ୩୬ଟି ମାନଦଣ୍ଡରେ ପରୀକ୍ଷା ହେଉଛି। ୨୦୧୮ର ୧୯ଟି ପ୍ରଦୂଷିତ ନଦୀଖଣ୍ଡ ୨୦୨୫ରେ ୬କୁ ହ୍ରାସ ପାଇଛି। ‘ବରୁଣ’ ଚଳନ୍ତି ପରୀକ୍ଷାଗାର କ୍ଷେତ୍ରସ୍ତରରେ ଦ୍ରୁତ ଫଳ ଦେଉଥିବାବେଳେ ‘ସାଗର ଉତ୍କଳ’ ଜାହାଜ ଉପକୂଳ ଓ ଆଭ୍ୟନ୍ତରୀଣ ଜଳପଥର ତଥ୍ୟ ସଂଗ୍ରହ କରୁଛି।
ଡିଜିଟାଲ ରୂପାନ୍ତର ଓ ବାସ୍ତବ ସମୟ ନିରୀକ୍ଷଣ
ଅନଲାଇନ୍ କନ୍ସେଣ୍ଟ ଓ ଅଥରାଇଜେସନ୍ ବ୍ୟବସ୍ଥା ଅନୁମୋଦନକୁ ସ୍ୱଚ୍ଛ ଓ ସୁଲଭ କରିଛି। ୨୦୨୫-୨୬ରେ ୧,୫୯୧ଟି ସ୍ଥାପନ ସମ୍ମତି ଓ ୪,୩୭୦ଟି ପରିଚାଳନା ସମ୍ମତି ଦିଆଯାଇଥିଲା; ନିୟମଭଙ୍ଗ କିମ୍ବା ଅସମ୍ପୂର୍ଣ୍ଣ ତଥ୍ୟ ପାଇଁ ୫୭୭ଟି ଆବେଦନ ପ୍ରତ୍ୟାଖ୍ୟାନ ହୋଇଥିଲା। ୩୧୮ଟି ଶିଳ୍ପ ଓ ଖଣି ୟୁନିଟ୍ର ଅନଲାଇନ୍ ତଥ୍ୟ ଏବଂ ୨୭୯ଟି ପ୍ରତିଷ୍ଠାନର କ୍ୟାମେରା ‘ପ୍ରସାର’ ଡ୍ୟାସବୋର୍ଡ ସହ ଯୋଡ଼ାଯାଇଛି।
ଦାୟିତ୍ୱପୂର୍ଣ୍ଣ ଶିଳ୍ପାୟନ
ଇସ୍ପାତ, ଆଲୁମିନିୟମ, ବିଦ୍ୟୁତ, ବନ୍ଦର ଓ ଖଣି କ୍ଷେତ୍ରରେ ପ୍ରତିକ୍ରିୟାମୂଳକ କାର୍ଯ୍ୟ ପରିବର୍ତ୍ତେ ପ୍ରତିରୋଧମୂଳକ ଅନୁପାଳନକୁ ଗୁରୁତ୍ୱ ଦିଆଯାଉଛି। ପରିବେଶ କାର୍ଯ୍ୟଦକ୍ଷତା ବ୍ୟାଙ୍କ ଗ୍ୟାରେଣ୍ଟି ଶିଳ୍ପକୁ ଦାୟୀ କରୁଛି ଏବଂ ୪୬ରୁ ଅଧିକ ଜନଶୁଣାଣି ସ୍ଥାନୀୟ ସମୁଦାୟର ମତକୁ ନିଷ୍ପତ୍ତିରେ ସ୍ଥାନ ଦେଇଛି।
ବର୍ଜ୍ୟ ପରିଚାଳନାରୁ ଚକ୍ରାକାର ଅର୍ଥନୀତି
ବିପଜ୍ଜନକ, ଜୈବ-ଚିକିତ୍ସା ଓ ପ୍ଲାଷ୍ଟିକ ବର୍ଜ୍ୟର ସୁରକ୍ଷିତ ପରିଚାଳନା ସହ ୫୦୦ଟି ପର୍ଯ୍ୟଟନ ଓ ବଣଭୋଜି ସ୍ଥଳକୁ ପ୍ଲାଷ୍ଟିକମୁକ୍ତ କରିବାର ଲକ୍ଷ୍ୟ ରହିଛି। ପୁରୀ ରଥଯାତ୍ରାରେ ୨୬.୩ ମେଟ୍ରିକ୍ ଟନ୍ PET ବୋତଲ ସଂଗ୍ରହ ଓ ପୁନଃଚକ୍ରୀକରଣ ଜନସହଭାଗିତାର କ୍ଷମତା ଦେଖାଇଛି। ୨୦୨୫-୨୬ରେ ୯୮.୩୬ ପ୍ରତିଶତ ଫ୍ଲାଏ ଆଶ୍ ବ୍ୟବହାର ଶିଳ୍ପ ଉପ-ଉତ୍ପାଦକୁ ନିର୍ମାଣ ସମ୍ପଦରେ ପରିଣତ କରିଛି।
Accident: ଅଜଣା ଗାଡ଼ିକୁ ପଛରୁ ଧକ୍କାଦେଲା ପରିବା ବୋଝେଇ ଟ୍ରକ୍, ଚାଳକ ମୃତ
ଜ୍ଞାନ, ସହଭାଗିତା ଓ ଆଗାମୀ ପଥ
ସେମିନାର, ପ୍ରଶିକ୍ଷଣ, ଗବେଷଣା ସହଯୋଗ ଏବଂ ୧୯୯୮ରୁ ପ୍ରଦୂଷଣ ନିୟନ୍ତ୍ରଣ ଉତ୍କର୍ଷ ପୁରସ୍କାର ମାଧ୍ୟମରେ ବୋର୍ଡ଼ ଉତ୍ତମ ପରିବେଶ କାର୍ଯ୍ୟଦକ୍ଷତାକୁ ପ୍ରେରଣା ଦେଉଛି। ପ୍ରକୃତିର ସୁରକ୍ଷା ସହ ବିକାଶକୁ ଆଗେଇ ନେବା ହିଁ ଓଡ଼ିଶାର ସବୁଜ, ସୁସ୍ଥ ଓ ସମୃଦ୍ଧ ଭବିଷ୍ୟତର ମୂଳ ଆଧାର। ତଥ୍ୟଭିତ୍ତିକ ନିଷ୍ପତ୍ତି, ସ୍ୱଚ୍ଛ ପ୍ରଶାସନ ଏବଂ ସମୟୋଚିତ ପଦକ୍ଷେପ ମାଧ୍ୟମରେ ଏହି ଲକ୍ଷ୍ୟ ସାକାର ହୋଇପାରିବ। ନିରୀକ୍ଷଣ ନେଟୱାର୍କର ବିସ୍ତାର ଛୋଟ ସହର, ଶିଳ୍ପାଞ୍ଚଳ, ଖଣି ଅଞ୍ଚଳ ଓ ଉପକୂଳର ସମସ୍ୟାକୁ ଶୀଘ୍ର ଧରିବାରେ ସହାୟକ ହେବ। ସ୍ୱଚ୍ଛ ଇନ୍ଧନ, ଜଳ ପୁନଃବ୍ୟବହାର, ସମ୍ପଦ ସଞ୍ଚୟ ଓ ଦାୟିତ୍ୱପୂର୍ଣ୍ଣ ଉତ୍ପାଦନ ଶିଳ୍ପର ପରିବେଶ ପଦଚିହ୍ନ କମାଇପାରିବ। ଏହା ସହ ସ୍କୁଲ, କଲେଜ ଓ ସମୁଦାୟ ସ୍ତରର ସଚେତନତା ଦୈନନ୍ଦିନ ଆଚରଣରେ ପରିବର୍ତ୍ତନ ଆଣିବ। ଅଭିଯୋଗର ଦ୍ରୁତ ସମାଧାନ, ତଥ୍ୟର ସାର୍ବଜନୀନ ଉପଲବ୍ଧତା ଏବଂ ନିୟମିତ ପରିବେଶ ଅଡିଟ୍ ବିଶ୍ୱାସ ବଢ଼ାଇବ। ଏହା ସହ ପ୍ରତ୍ୟେକ ପ୍ରକଳ୍ପରେ ପୁନରୁଦ୍ଧାର ଓ ପୁନଃଚକ୍ରୀକରଣକୁ ଆରମ୍ଭରୁ ସ୍ଥାନ ଦେଲେ ବିକାଶ ଦୀର୍ଘସ୍ଥାୟୀ ହେବ।
