1 week ago
8
ARTICLE AD BOX
ସାଗର: ମଧ୍ୟପ୍ରଦେଶର ସାଗର ଜିଲ୍ଲାରେ ରବିବାର ବିଷାକ୍ତ ମଦ ପିଇ ୧୦ ଜଣଙ୍କର ମୃତ୍ୟୁ ଘଟିଥିବାବେଳେ ୨୦ରୁ ଅଧିକ ଲୋକ ଅସୁସ୍ଥ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଅସୁସ୍ଥଙ୍କ ମଧ୍ୟରେ ଅନେକଙ୍କ ସ୍ବାସ୍ଥ୍ୟାବସ୍ଥା ଜଟିଳ ରହିଛି। ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ପଡ଼ୋଶୀ ଉତ୍ତରପ୍ରଦେଶର ଲଳିତପୁରରୁ ମଦ ଯୋଗାଣ ହେଉଥିଲା। ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ ଘଟଣାର ତଦନ୍ତ ନିର୍ଦ୍ଦେଶ ଦେବା ସହ ଦୋଷୀଙ୍କୁ ଛଡ଼ାଯିବ ନାହିଁ ବୋଲି କହିଛନ୍ତି। ବିରୋଧୀ କଂଗ୍ରେସ ଏହି ଦୁଃଖଦ ଘଟଣାର ନ୍ୟାୟିକ ତଦନ୍ତ ଦାବି କରିଛି। ଜିଲ୍ଲା ପ୍ରଶାସନ ସତର୍କତାମୂଳକ ପଦକ୍ଷେପ ସ୍ୱରୂପ ପ୍ରଭାବିତ ଅଞ୍ଚଳରେ ସାତଟି ମଦ ଦୋକାନକୁ ସିଲ୍ କରିଛି ଓ ନମୁନା ସଂଗ୍ରହ କରାଯାଇଛି। ଶନିବାର ରାତିରେ ମଦ ପିଇବା ପରେ ଗୁଘର, ନାଓରାଜ, ବାରାଜ ଏବଂ ଆଖପାଖ ଅଞ୍ଚଳର କେତେକ ଗ୍ରାମବାସୀ ଅସୁସ୍ଥ ହୋଇ ପଡ଼ିଥିଲେ। ସେମାନଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ପରିବାର ଲୋକେ ତୁରନ୍ତ ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରିଥିଲେ। ଆଜି ଅପରାହ୍ଣ ସୁଦ୍ଧା ୧୦ ଜଣଙ୍କର ମୃତ୍ୟୁ ହୋଇଥିବା ବେଳେ ୩ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଆଲୋଡ଼ନ ସୃଷ୍ଟି ହୋଇଛି।
Competition: ଜିଲ୍ଲାରେ ୨୯୯୬ ପ୍ରତିଯୋଗୀ: ନବରଙ୍ଗପୁରରେ ସର୍ବାଧିକ ୭୪୪ ପ୍ରତିଯୋଗୀ
ଅବୈଧ ମଦ ପ୍ରସ୍ତୁତି ଓ ବିକ୍ରିକୁ ରୋକିବା ପାଇଁ ପୁଲିସ ବ୍ୟାପକ ଚଢ଼ଉ ଜାରି ରଖିଛି। ଆହୁରି କିଛି ଲୋକ ଅସୁସ୍ଥ ଥାଇପାରନ୍ତି ବୋଲି ପ୍ରଶାସନ ସନ୍ଦେହ କରୁଥିବାରୁ ବିଭିନ୍ନ ଗ୍ରାମରୁ ଅସୁସ୍ଥଙ୍କ ସଂପର୍କରେ ଖବର ସଂଗ୍ରହ କରାଯାଉଛି। ଗତମାସରେ ଗୁଜରାଟର ଭାବନଗର ଜିଲ୍ଲାରେ ବିଷାକ୍ତ ମଦ ପିଇ ୧୩ ଜଣଙ୍କର ମୃତ୍ୟୁ ଘଟିଥିବା ବେଳେ ଅନେକ ଲୋକ ଡାକ୍ତରଖାନାରେ ଭର୍ତ୍ତି ହୋଇଥିଲେ। ପୁଲିସ ସେହି ମାମଲାରେ ୧୩ ଜଣ ଅଭିଯୁକ୍ତଙ୍କୁ ଗିରଫ କରିଥିଲା ଏବଂ ଉକ୍ତ ମଦରେ ୩୮.୫୯ ପ୍ରତିଶତ ମିଥାନଲ୍ ଥିବା ତଦନ୍ତରୁ ଜଣାପଡ଼ିଥିଲା।
Health: ପଞ୍ଜାବରେ ପ୍ରଥମ ସନ୍ଦିଗ୍ଧ ସ୍ୱାଇନ୍ ଫ୍ଲୁ ମୃତ୍ୟୁ, ୨୨୦ ଏଚ୍୧ଏନ୍୧ ଆକ୍ରାନ୍ତ
