1 day ago
2
ARTICLE AD BOX
ରିୟାଦ: ମକ୍କାରେ ହୁତି ବିଦ୍ରୋହୀମାନେ ଆକ୍ରମଣ କରିଥିବା ସାଉଦି ଆରବ ପକ୍ଷରୁ ଦାବି କରାଯାଇଛି। ତେବେ ୟେମେନର ହୁତିମାନେ ଏହି ଦାବିକୁ ଅସ୍ବୀକାର କରି ଏହାକୁ ଏକ ପୁରୁଣା ମିଛ ବୋଲି କହିଛନ୍ତି। ବିଦ୍ରୋହୀଙ୍କ ପଲିଟବ୍ୟୁରୋର ସଦସ୍ୟ ହାଜେମ ଅଲ-ଆସାଦ ସୋସିଆଲ ମିଡିଆ ଏକ୍ସରେ ଲେଖିଛନ୍ତି,ମକ୍କାକୁ ଟାର୍ଗେଟ କରିବାର ଦାବି ସମ୍ପୂର୍ଣ୍ଣ ମିଛ। ସାଉଦି ପୂର୍ବରୁ ମଧ୍ୟ ଏଭଳି କହିସାରିଛି। ସାଉଦି ଆରବ କହିଛି ଯେ, ବିଦ୍ରୋହୀମାନେ ଏକ ଡ୍ରୋନ୍ ସାହାଯ୍ୟରେ ମକ୍କା ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲେ, କିନ୍ତୁ ଏହାକୁ ମଝି ଆକାଶରେ ଗୁଳି କରି ଖସାଇ ଦିଆଯାଇଥିଲା। ସାଉଦି ମୁଖପାତ୍ର ତୁର୍କି ଅଲ-ମାଲିକି ଏହି ଆକ୍ରମଣକୁ କଡ଼ା ନିନ୍ଦା କରି କହିଛନ୍ତି, ପବିତ୍ର ସ୍ଥଳକୁ ଆସିଥିବା ସାଧାରଣ ନାଗରିକଙ୍କୁ ଭୟଭୀତ କରିବା ପାଇଁ ଏହା ଏକ ଷଡ଼ଯନ୍ତ୍ର। ପବିତ୍ର ସ୍ଥଳକୁ ଆସିଥିବା ତୀର୍ଥଯାତ୍ରୀଙ୍କ ସୁରକ୍ଷା ଦେବା ଆମର ସର୍ବୋଚ୍ଚ ପ୍ରାଥମିକତା। ବିଦ୍ରୋହୀଙ୍କ ଯେକୌଣସି ପ୍ରୟାସକୁ ପଣ୍ଡ କରାଯିବ।
ସାଉଦି ପକ୍ଷରୁ ସତର୍କ ସୂଚନା ଜାରି
ଆକ୍ରମଣ ନେଇ ସାଉଦି ପକ୍ଷରୁ ଏକ ସତର୍କ ସୂଚନା ଜାରି କରାଯାଇଥିଲା। ୨୦୧୭ ପରେ ମକ୍କାରେ ପ୍ରଥମ ଥର ପାଇଁ ଏପରି ସୁରକ୍ଷା ସତର୍କତା ଜାରି କରାଯାଇଥିଲା। ସାଉଦି ଆରବର ନାଗରିକ ପ୍ରତିରକ୍ଷା ବିଭାଗ ଦେଶର ପଶ୍ଚିମ ଉପକୂଳର ଅନେକ ସହରରେ ଏକ ସତର୍କତା ଜାରି କରିଥିଲା, ଯେଉଁଥିରେ ପବିତ୍ର ମକ୍କା ସହର, ଜେଦ୍ଦା ଏବଂ ତାଇଫ ପ୍ରଦେଶ ଅନ୍ତର୍ଭୁକ୍ତ ଥିଲା। ତେବେ ବିପଦ ଟଳିଯିବାର କିଛି ମିନିଟ୍ ମଧ୍ୟରେ ସତର୍କତା ପ୍ରତ୍ୟାହାର କରି ନିଆଯାଇଥିଲା।
ଇସଲାମିକ ସହଯୋଗ ସଂଗଠନ (ଓଆଇସି) ମକ୍କା ଏବଂ ମଦିନା ଅଞ୍ଚଳରେ ହୁତିଙ୍କ ଆକ୍ରମଣକୁ ଦୃଢ଼ ନିନ୍ଦା କରି କହିଛି, ଏହି ଆକ୍ରମଣ ସାଧାରଣ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିବା, ପବିତ୍ର ସ୍ଥଳ ଏବଂ ମସଜିଦର ପବିତ୍ରତାକୁ ଉଲ୍ଲଂଘନ କରିବା ଏବଂ ବିଶ୍ୱବ୍ୟାପୀ ମୁସଲମାନମାନଙ୍କ ଭାବନାକୁ ଆଘାତ ଦେବା ପାଇଁ ଉଦ୍ଦିଷ୍ଟ ଥିଲା।
ଓଆଇସି ଜେନେରାଲ ସେକ୍ରେଟେରିଏଟ୍ ଏକ ବିବୃତି ଜାରି କରି କହିଛି ଯେ, ପବିତ୍ର ସ୍ଥଳ, ମସଜିଦ ଏବଂ ସାର୍ବଜନୀନ ସ୍ଥାନ ଉପରେ ଆକ୍ରମଣ ଆତଙ୍କବାଦ। ଏହି ଆକ୍ରମଣ ଇସଲାମିକ ମୂଲ୍ୟବୋଧ ଏବଂ ଅନ୍ତର୍ଜାତୀୟ ମାନଦଣ୍ଡ ଏବଂ ଆଇନ ବିପରୀତ। ପବିତ୍ର ସ୍ଥଳର ପବିତ୍ରତା ଉଲ୍ଲଂଘନ ଏକ ଗୁରୁତର ପାପ ଏବଂ ଏହାକୁ ଗ୍ରହଣ କିମ୍ବା ସହ୍ୟ କରାଯାଇପାରିବ ନାହିଁ। ଏପରି କାର୍ଯ୍ୟ କରୁଥିବା ଲୋକଙ୍କ ପାଇଁ ଏହାକୁ ବନ୍ଦ କରିବା ଅତ୍ୟନ୍ତ ଜରୁରୀ।
