3 weeks ago
11
ARTICLE AD BOX
କୋଲକାତା: ପଶ୍ଚିମବଙ୍ଗର ବରୁଇପୁର ନାବାଳିକା ଦୁଷ୍କର୍ମ ମାମଲାର ଅଭିଯୁକ୍ତ ପ୍ରଭାସ ମଣ୍ଡଳ ପୁଲିସ୍ ଏନକାଉଣ୍ଟରରେ ନିହତ ହୋଇଛି। ପୁଲିସ ଦ୍ବାରା ଅପରାଧିକ ଦୃଶ୍ୟ ପୁନଃସ୍ଥାପନ କରିବାକୁ ଚେଷ୍ଟା କରାଯିବା ସମୟରେ ଅଭିଯୁକ୍ତ ପୁଲିସର ବନ୍ଧୁକ ଛଡ଼ାଇ ନେଇ ଖସି ଯିବାକୁ ଚେଷ୍ଟା କରୁଥିଲା। ସ୍ଥାନୀୟ ପୁଲିସର ସୂଚନା ଅନୁଯାୟୀ, ଅଭିଯୁକ୍ତ ପୁଲିସ ଉପରକୁ ଗୁଳିଚାଳନା କରିବାକୁ ଚେଷ୍ଟା କରୁଥିବାବେଳେ ପୁଲିସର ପାଲଟା ଗୁଳିରେ ସେ ଆହତ ହୋଇଥିଲା। ଅଭିଯୁକ୍ତ ମଣ୍ଡଳକୁ ତୁରନ୍ତ ହସ୍ପିଟାଲକୁ ନିଆଯାଇଥିବାବେଳେ ଡାକ୍ତର ତାକୁ ମୃତ ଘୋଷଣା କରିଥିଲେ।
ସୂଚନାଯୋଗ୍ୟ, ପଶ୍ଚିମବଙ୍ଗର ଦକ୍ଷିଣ ୨୪ ପରଗଣା ଜିଲ୍ଲାର ବରୁଇପୁରରେ ଜଣେ ୧୨ ବର୍ଷୀୟା ନାବାଳିକାକୁ ଅପହରଣ ପରେ ଦୁଷ୍କର୍ମ କରି ହତ୍ୟା କରାଯାଇଥିଲା। ଝିଅଟି ନିଖୋଜ ହେବାର ଦିନକ ପରେ ରବିବାର ସୂର୍ଯ୍ୟପୁର ହାଟ ଅଞ୍ଚଳରୁ ତାଙ୍କର ମୃତଦେହ ଉଦ୍ଧାର କରାଯାଇଥିଲା। ପୁଲିସ ଏହି ମାମଲାରେ ତଦନ୍ତ ପାଇଁ ସ୍ବତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ଗଠନ କରିବା ସହିତ ତିନି ଜଣ ଅଭିଯୁକ୍ତଙ୍କୁ ଗିରଫ କରିଥିଲା। ପୁଲିସର ସୂଚନା ଅନୁଯାୟୀ, ବରୁଇପୁର ପୁଲିସ ଷ୍ଟେସନର ଏକ ଦଳ ଜଣେ ଅଭିଯୁକ୍ତକୁ ରାତି ପ୍ରାୟ ୧୨ଟା ୪୫ ମିନିଟରେ ପୀଡ଼ିତାଙ୍କ ମୃତଦେହ ଉଦ୍ଧାର ହୋଇଥିବା ସ୍ଥାନକୁ ଘଟଣାର ଦୃଶ୍ୟ ପୁନଃ ସ୍ଥାପନ କରିବାକୁ ନେଇଥିବାବେଳେ ଏନକାଉଣ୍ଟର ହୋଇଥିଲା। ତଦନ୍ତକାରୀମାନେ ସନ୍ଦେହ କରୁଛନ୍ତି ଯେ, ଅଭିଯୁକ୍ତମାନଙ୍କ ମଧ୍ୟରୁ ଜଣେ ନାବାଳିକାଙ୍କୁ ଏକ ଝୁମ୍ପୁଡ଼ି ଘରକୁ ନେଇଯାଇଥିଲା ଯେଉଁଠାରେ ଘଟଣା ପୂର୍ବରୁ ଅନ୍ୟ ଦୁଇ ଅଭିଯୁକ୍ତ ଉପସ୍ଥିତ ଥିଲେ।
TMC Allegations: ମମତାଙ୍କୁ ଗୃହବନ୍ଦୀ କରିବା ଷଡଯନ୍ତ୍ର!: ବାରୁଇପୁର ଗଣଦୁଷ୍କର୍ମ ମାମଲାରେ କ୍ରୋଧିତ ଟିଏମସି ନେତା
ପ୍ରାଥମିକ ଶବବ୍ୟବଚ୍ଛେଦ ରିପୋର୍ଟରୁ ଜଣାପଡ଼ିଛି ଯେ, ଅଭିଯୁକ୍ତମାନେ ପୀଡ଼ିତା ଜୀବିତ ଥିବାବେଳେ ତାଙ୍କୁ ଏକ ଅଖାରେ ଭର୍ତ୍ତି କରି ପୋଖରୀକୁ ଫିଙ୍ଗି ଦେଇଥିଲେ। ତେବେ ମୃତ୍ୟୁର ପ୍ରକୃତ କାରଣ ଫୋରେନସିକ୍ ଓ ଭିସେରା ପରୀକ୍ଷା ପରେ ଜଣାପଡ଼ିବ ବୋଲି ପୁଲିସ କହିଛି। ପୀଡ଼ିତାଙ୍କ ମୃତଦେହ ଉଦ୍ଧାର ହେବା ପରେ ଉତ୍ତ୍ୟକ୍ତ ସ୍ଥାନୀୟ ଲୋକମାନେ ବରୁଇପୁର-ଜୟନଗର ରାସ୍ତା ଅବରୋଧ କରି ଟାୟାର ଜାଳି ଓ ପୁଲିସ ଗାଡ଼ି ଭଙ୍ଗାରୁଜା କରି ପ୍ରତିବାଦ ପ୍ରଦର୍ଶନ କରିଥିଲେ। ନାବାଳିକାଙ୍କ ମୃତଦେହ ଉଦ୍ଧାର ହେବାର କିଛି ଘଣ୍ଟା ପରେ ଉତ୍ତ୍ୟକ୍ତ ଲୋକମାନେ ଅପରାଧରେ ସମ୍ପୃକ୍ତି ସନ୍ଦେହ କରି ଇନ୍ଦ୍ରଜିତ ମଣ୍ଡଳ ନାମକ ଜଣେ ବ୍ୟକ୍ତିଙ୍କୁ ପିଟିପିଟି ହତ୍ୟା କରିଥିଲେ।
ଜନ ଅସନ୍ତୋଷ ବୃଦ୍ଧି ପାଉଥିବାବେଳେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ମଙ୍ଗଳବାର ପୁଲିସ ମହାନିର୍ଦ୍ଦେଶକ ସିଦ୍ଧ ନାଥ ଗୁପ୍ତାଙ୍କୁ ୭୨ ଘଣ୍ଟା ମଧ୍ୟରେ ମାମଲାର ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ତଦନ୍ତରେ କୌଣସି ଅବହେଳା ଦେଖାଗଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଭିଡ଼ ଆକ୍ରମଣରେ ନିହତ ଇନ୍ଦ୍ରଜିତ ମଣ୍ଡଳ ପୁଲିସର ତଦନ୍ତ ଅନୁସାରେ ନିର୍ଦ୍ଦୋଷ ଏବଂ ତାଙ୍କ ପରିବାରକୁ ନ୍ୟାୟ ମିଳିବ ବୋଲି ମୁଖ୍ୟମନ୍ତ୍ରୀ ଆଶ୍ୱାସନା ଦେଇଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ, ପ୍ରତିବାଦ ସମୟରେ ସାର୍ବଜନୀନ ସମ୍ପତ୍ତି ଭଙ୍ଗାରୁଜା, ପୁଲିସ ଗାଡ଼ି ଓ ରେଳ ଟ୍ରାକକୁ କ୍ଷତି ପହଞ୍ଚାଇବାରେ ସମ୍ପୃକ୍ତ ପ୍ରାୟ ୨୦୦ ଜଣଙ୍କୁ ଚିହ୍ନଟ କରାଯାଇଛି। ସେମାନଙ୍କୁ ଗିରଫ କରାଯିବ। ନିର୍ଦ୍ଦୋଷ ବ୍ୟକ୍ତିଙ୍କ ହତ୍ୟାରେ ସମ୍ପୃକ୍ତ ଲୋକଙ୍କ ବିରୋଧରେ ହତ୍ୟା ଅଭିଯୋଗ ଆସିବ ବୋଲି ସେ ଆହୁରି ମଧ୍ୟ କହିଛନ୍ତି। ମୃତ ନାବାଳିକାଙ୍କ ପରିବାର ସୂର୍ଯ୍ୟପୁରରେ ଏକ ପୁଲିସ ଆଉଟପୋଷ୍ଟ ପ୍ରତିଷ୍ଠା ପାଇଁ ଅନୁରୋଧ କରିଥିଲେ। ମୁଖ୍ୟମନ୍ତ୍ରୀ ତାଙ୍କର ପରବର୍ତ୍ତୀ ବରୁଇପୁର ଗସ୍ତ ସମୟରେ ପୁଲିସ ଆଉଟପୋଷ୍ଟ ଉଦଘାଟନ କରିବାକୁ ପ୍ରତିଶ୍ରୁତି ଦେଇଛନ୍ତି। ମୁଖ୍ୟମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ପୀଡ଼ିତାଙ୍କ ପରିବାର କ୍ଷତିପୂରଣ ଓ ଅନ୍ୟାନ୍ୟ ସହାୟତା ମାଗିଛନ୍ତି, ଯାହା ସେ ଏକ ସପ୍ତାହ ମଧ୍ୟରେ ଉଭୟ ପ୍ରଭାବିତ ପରିବାରକୁ ଭେଟିବା ପରେ ଘୋଷଣା କରାଯିବ।
