4 days ago
6
ARTICLE AD BOX
ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଚୀନ୍ ରାଷ୍ଟ୍ରପତି ସି ଜିନ୍ପିଙ୍ଗ୍ଙ୍କ ମଧ୍ୟରେ ଦ୍ବିପାକ୍ଷିକ ଆଲୋଚନା ପରେ ଚୀନ୍ ନୀତିକୁ ନେଇ କେନ୍ଦ୍ର ସରକାରଙ୍କୁ ଟାର୍ଗେଟ୍ କରିଛି କଂଗ୍ରେସ। ରବିବାର କଂଗ୍ରେସ ମହାସଚିବ ତଥା ଯୋଗାଯୋଗ ବିଭାଗ ଦାୟିତ୍ବରେ ଥିବା ଜୟରାମ ରମେଶ ପ୍ରଧାନମନ୍ତ୍ରୀଙ୍କୁ ଚୀନ୍ ସହ ସମ୍ପର୍କ ନେଇ ୪ଟି ପ୍ରଶ୍ନ କରିବା ସହ ସରକାରଙ୍କ ଆଭିମୁଖ୍ୟକୁ ‘କ୍ୟାଲିବ୍ରେଟେଡ୍ କ୍ୟାପିଟୁଲେସନ’ ବା ‘ଯୋଜନାବଦ୍ଧ ଆତ୍ମସମର୍ପଣ’ ବୋଲି ସମାଲୋଚନା କରିଛନ୍ତି।
ରମେଶ ପ୍ରଶ୍ନ କରିଛନ୍ତି ଯେ, ୨୦୨୦ ଜୁନ୍ ୧୯ରେ ଚୀନ୍କୁ ନେଇ ପ୍ରଧାନମନ୍ତ୍ରୀ ଦେଇଥିବା ‘କ୍ଲିନ୍ ଚିଟ୍’ ଭାରତର ଆଲୋଚନା କ୍ଷମତାକୁ ଦୁର୍ବଳ କରିନାହିଁ ତ? ଲଦାଖରେ ଚୀନ୍ର ଅଗ୍ରସରକୁ ସରକାର କାହିଁକି ଅନୁମତି ଦେଲେ ଏବଂ ଏବେ ଅରୁଣାଚଳ ପ୍ରଦେଶକୁ ନେଇ ଚୀନ୍ର ଦାବି ଓ ପଦକ୍ଷେପ ସମ୍ପର୍କରେ ଭାରତର ଆଭିମୁଖ୍ୟ? ସେ ଆହୁରି ପ୍ରଶ୍ନ କରିଛନ୍ତି ଯେ, ଅପରେସନ୍ ସିନ୍ଦୂର ସମୟରେ ପାକିସ୍ତାନକୁ ଚୀନ୍ର ସମର୍ଥନ ନେଇ ଭାରତର ଆଭିମୁଖ୍ୟ କାହିଁକି ନରମ ହୋଇଛି। ଏହାସହ ଚୀନ୍ ସହ ବାଣିଜ୍ୟ ନିଅଣ୍ଟ ବୃଦ୍ଧି ନେଇ ମଧ୍ୟ କଂଗ୍ରେସ ଚିନ୍ତା ପ୍ରକାଶ କରିଛି। ୨୦୨୫-୨୬ରେ ଭାରତ-ଚୀନ୍ ବାଣିଜ୍ୟ ନିଅଣ୍ଟ ରେକର୍ଡ ୧୧୨.୬ ବିଲିୟନ୍ ଡଲାରରେ ପହଞ୍ଚିଥିବା ରମେଶ କହିଛନ୍ତି। ଗୁରୁତ୍ବପୂର୍ଣ୍ଣ କଞ୍ଚାମାଲ, ଉପାଦାନ ଓ ଅନ୍ୟାନ୍ୟ ସାମଗ୍ରୀ ପାଇଁ ଚୀନ୍ ଉପରେ ଭାରତର ନିର୍ଭରଶୀଳତା ବିପଜ୍ଜନକ ସ୍ତରରେ ପହଞ୍ଚିଥିବା ସେ ଅଭିଯୋଗ କରିଛନ୍ତି।
ଏହି ବୟାନ ମୋଦୀ-ଜିନ୍ପିଙ୍ଗ ଆଲୋଚନାର ଗୋଟିଏ ଦିନ ପରେ ଆସିଛି। ୧୮ଶ ବ୍ରିକ୍ସ ଶିଖର ସମ୍ମିଳନୀ ଅବସରରେ ନୂଆଦିଲ୍ଲୀରେ ହୋଇଥିବା ବୈଠକରେ ଦୁଇ ନେତା ଦ୍ବିପାକ୍ଷିକ ସମ୍ପର୍କରେ ସ୍ଥିର ଅଗ୍ରଗତିକୁ ସ୍ବାଗତ କରିଥିଲେ। ମୋଦୀ କହିଥିଲେ ଯେ ସୀମାରେ ଶାନ୍ତି ଓ ସ୍ଥିରତା ଭାରତ-ଚୀନ୍ ସମ୍ପର୍କରେ ଉନ୍ନତି ପାଇଁ ଅତ୍ୟାବଶ୍ୟକ।
ଆହୁରି ପଢନ୍ତୁ: Mayurbhanj Journalists’ ମୟୂରଭଞ୍ଜ ସାମ୍ବାଦିକ ସଂଘର ସାଧାରଣ ପରିଷଦ ବୈଠକ ଓ ରାଜ୍ୟସ୍ତରୀୟ ଆଲୋଚନାଚକ୍ର
ଗଲୱାନ୍ ଉପତ୍ୟକାରେ ୨୦୨୦ ଜୁନ୍ରେ ଭାରତ-ଚୀନ୍ ସେନା ସଂଘର୍ଷରେ ୨୦ ଭାରତୀୟ ଯବାନ ସହିଦ ହୋଇଥିଲେ। ଏହା ପରେ ସୀମା ସମ୍ପର୍କିତ ଆଲୋଚନାରେ ସରକାରଙ୍କ ଆଭିମୁଖ୍ୟ ନେଇ ରମେଶ ପ୍ରଶ୍ନ ଉଠାଇଛନ୍ତି। ଅରୁଣାଚଳରେ ଚୀନ୍ର ସ୍ଥାନଗୁଡ଼ିକର ନାମ ବଦଳାଇବା, ଅଞ୍ଚଳ ଉପରେ ଦାବି ଏବଂ ବ୍ରହ୍ମପୁତ୍ର ଉପରେ ବଡ଼ ବନ୍ଧ ଯୋଜନା ନେଇ ମଧ୍ୟ ସେ ପ୍ରଶ୍ନ କରିଛନ୍ତି। କଂଗ୍ରେସର ଏହି ଅଭିଯୋଗ ଉପରେ କେନ୍ଦ୍ର ସରକାର କିମ୍ବା ବିଜେପି ପକ୍ଷରୁ ତୁରନ୍ତ କୌଣସି ପ୍ରତିକ୍ରିୟା ମିଳିନାହିଁ।
