3 days ago
5
ARTICLE AD BOX
ଭୁବନେଶ୍ବର:ପିଲା ବାରମ୍ବାର ଅସୁସ୍ଥ ହେଉଛି। କେତେବେଳେ କାଶ ଓ ଥଣ୍ଡା, ତ ଆଉ କେତେବେଳେ ଗଳା ଦରଜ ଓ ଜ୍ୱର। ପିଲାଙ୍କଠାରେ ଏଭଳି ସମସ୍ୟା ବାରମ୍ବାର ଦେଖାଦେଲେ ଅଭିଭାବକମାନେ ସ୍ୱାଭାବିକ ଭାବେ ଚିନ୍ତିତ ହୋଇପଡ଼ନ୍ତି। ଅନେକେ ଏହାକୁ ପିଲାର ଦୁର୍ବଳ ପ୍ରତିରୋଧକ ଶକ୍ତି ସହ ଯୋଡ଼ି ଦେଖନ୍ତି। ତେବେ ପିଲା ବାରମ୍ବାର ଅସୁସ୍ଥ ହେବାର କାରଣ କେବଳ ଦୁର୍ବଳ ପ୍ରତିରୋଧକ ଶକ୍ତି ନୁହେଁ ବୋଲି ବିଶେଷଜ୍ଞମାନେ କହୁଛନ୍ତି।
ଦୁର୍ବଳ ପ୍ରତିରୋଧକ ଶକ୍ତିର ଲକ୍ଷଣ
ଦିଲ୍ଲୀର ବିଏଲକେ-ମ୍ୟାକ୍ସ ହସ୍ପିଟାଲର ଶିଶୁରୋଗ ବିଭାଗର ପ୍ରଧାନ ନିର୍ଦ୍ଦେଶକଙ୍କ ଅନୁଯାୟୀ, ଜନ୍ମ ପରଠାରୁ ପିଲାଙ୍କ ପ୍ରତିରୋଧକ ବ୍ୟବସ୍ଥାର ବିକାଶ କିଛି ବର୍ଷ ପର୍ଯ୍ୟନ୍ତ ଜାରି ରହେ। ସାଧାରଣତଃ ପ୍ରାୟ ୫ ବର୍ଷ ବୟସ ପର୍ଯ୍ୟନ୍ତ ପିଲାଙ୍କ ପ୍ରତିରୋଧକ ବ୍ୟବସ୍ଥା ବିକଶିତ ହେଉଥିବାରୁ ଏହି ସମୟରେ ସେମାନଙ୍କଠାରେ ସଂକ୍ରମଣର ଆଶଙ୍କା ଅଧିକ ରହିପାରେ। ତେଣୁ ବାରମ୍ବାର ସର୍ଦ୍ଦି, କାଶ କିମ୍ବା ଜ୍ୱର ହେଲେ ତାହାକୁ ସିଧାସଳଖ ଦୁର୍ବଳ ପ୍ରତିରୋଧକ ଶକ୍ତିର ଲକ୍ଷଣ ବୋଲି ଧରିନେବା ଠିକ୍ ନୁହେଁ।
ପିଲାଙ୍କ ବାରମ୍ବାର ଅସୁସ୍ଥ ହେବା ପଛରେ ଜୀବନଶୈଳୀର ମଧ୍ୟ ଭୂମିକା ରହିପାରେ। ପର୍ଯ୍ୟାପ୍ତ ନିଦ ନହେବା, ଖାଦ୍ୟରେ ପ୍ରୋଟିନ୍ର ଅଭାବ, ଫଳ ଓ ପନିପରିବା କମ୍ ଖାଇବା ଏବଂ ଦୀର୍ଘ ସମୟ ଧରି ମୋବାଇଲ୍ କିମ୍ବା ଅନ୍ୟାନ୍ୟ ସ୍କ୍ରିନ୍ ବ୍ୟବହାର କରିବା ମଧ୍ୟ ପିଲାଙ୍କ ସ୍ୱାସ୍ଥ୍ୟକୁ ପ୍ରଭାବିତ କରିପାରେ। ଏଥିସହ ପିଲାଙ୍କ ପରିଷ୍କାର-ପରିଚ୍ଛନ୍ନତା ଏବଂ ଘରର ସ୍ୱଚ୍ଛତା ପ୍ରତି ଅବହେଳା କରାଗଲେ ସଂକ୍ରମଣର ଆଶଙ୍କା ବଢ଼ିପାରେ। ତେଣୁ କେବଳ ଔଷଧ ଉପରେ ନିର୍ଭର ନକରି ପିଲାଙ୍କ ଦୈନନ୍ଦିନ ଜୀବନଶୈଳୀ, ଖାଦ୍ୟପେୟ, ନିଦ ଏବଂ ପରିଷ୍କାର-ପରିଚ୍ଛନ୍ନତା ପ୍ରତି ଅଭିଭାବକମାନେ ଧ୍ୟାନ ଦେବା ଆବଶ୍ୟକ।
ପିଲାଙ୍କ ପ୍ରତିରୋଧକ ଶକ୍ତି ମଜବୁତ କରିବା ପାଇଁ କୌଣସି ବିଶେଷ ଔଷଧ କିମ୍ବା ଖାଦ୍ୟ ପୂରକ ଉପରେ ନିଜେ ନିଜେ ନିର୍ଭର ନକରି ସନ୍ତୁଳିତ ଜୀବନଶୈଳୀ ଉପରେ ଗୁରୁତ୍ୱ ଦେବା ଦରକାର। ପିଲାଙ୍କୁ ପୌଷ୍ଟିକ ଓ ବିବିଧ ଖାଦ୍ୟ ଦେବା, ପର୍ଯ୍ୟାପ୍ତ ନିଦ ପାଇଁ ସୁଯୋଗ ଦେବା ସହ ମୋବାଇଲ୍ ଓ ସ୍କ୍ରିନ୍ ସମୟ କମାଇବା ଆବଶ୍ୟକ। ଏଥିସହ ବୟସ ଅନୁଯାୟୀ ଖେଳକୁଦ ଓ ଶାରୀରିକ କାର୍ଯ୍ୟକଳାପ ପାଇଁ ମଧ୍ୟ ପିଲାଙ୍କୁ ସୁଯୋଗ ଦେବା ଉଚିତ। ସାଧାରଣ ଭାଇରାଲ୍ ସଂକ୍ରମଣରେ ପିଲା ଶୀଘ୍ର ସୁସ୍ଥ ହୋଇଯାଉଥିଲେ, ବୟସ ଅନୁଯାୟୀ ଉଚ୍ଚତା ଓ ଓଜନ ବଢ଼ୁଥିଲେ ଏବଂ ଅସୁସ୍ଥତା ମଧ୍ୟରେ ମଧ୍ୟ ସକ୍ରିୟ ରହୁଥିଲେ ସାଧାରଣତଃ ଅଧିକ ଚିନ୍ତାର କାରଣ ନଥାଇପାରେ।
Ganga Aarti: ସନାତନ ପରମ୍ପରା ସାତ ସମୁଦ୍ର ପାର ହୋଇ ଲଣ୍ଡନରେ ପହଞ୍ଚିଲା: ଟେମ୍ସ ନଦୀରେ ପ୍ରଥମ ଗଙ୍ଗା ଆରତୀ
କିନ୍ତୁ ସଂକ୍ରମଣ ବାରମ୍ବାର ଗୁରୁତର ହେଉଥିଲେ, ପିଲାକୁ ହସ୍ପିଟାଲରେ ବାରମ୍ବାର ଭର୍ତ୍ତି କରିବାକୁ ପଡ଼ୁଥିଲେ କିମ୍ବା ବାରମ୍ବାର ନିମୋନିଆ ଭଳି ଗୁରୁତର ସଂକ୍ରମଣ ହେଉଥିଲେ ଅଭିଭାବକମାନେ ଅବହେଳା ନକରି ଶିଶୁରୋଗ ବିଶେଷଜ୍ଞଙ୍କ ପରାମର୍ଶ ନେବା ଆବଶ୍ୟକ। ଆବଶ୍ୟକ ହେଲେ ବିଶେଷଜ୍ଞଙ୍କ ପରାମର୍ଶରେ ଅଧିକ ଯାଞ୍ଚ ଓ ଚିକିତ୍ସା କରାଇବା ଉଚିତ।
