2 weeks ago
5
ARTICLE AD BOX
ଆଜି ମାନବକୃତ ପ୍ରଦୂଷଣ ଯୋଗୁଁ ସମୁଦ୍ର ଏକ ବଡ଼ ସଙ୍କଟର ସମ୍ମୁଖୀନ ହେଉଛି, ଯାହାକୁ ବୈଜ୍ଞାନିକମାନେ ସମୁଦ୍ର ଜଳର ଅମ୍ଳୀକରଣ ବୋଲି କହୁଛନ୍ତି। ଗତ କିଛି ଦଶନ୍ଧି ମଧ୍ୟରେ କାରଖାନା, ଗାଡ଼ିମୋଟର ଏବଂ ଜୀବାଶ୍ମ ଜାଳେଣିର ଅତ୍ୟଧିକ ବ୍ୟବହାର ଯୋଗୁଁ ବାୟୁମଣ୍ଡଳରେ କାର୍ବନ ଡାଇଅକ୍ସାଇଡ୍ ଗ୍ୟାସ୍ର ମାତ୍ରା ବହୁତ ବଢ଼ିଯାଇଛି। ସମୁଦ୍ର ଏହି ଅତିରିକ୍ତ କାର୍ବନ ଡାଇଅକ୍ସାଇଡ୍ର ପ୍ରାୟ ୩୦ ପ୍ରତିଶତ ନିଜ ମଧ୍ୟକୁ ଶୋଷି ନେଇଥାଏ। ଯେତେବେଳେ ସମୁଦ୍ର ଜଳ ଏବଂ କାର୍ବନ ଡାଇଅକ୍ସାଇଡ୍ ମଧ୍ୟରେ ରାସାୟନିକ ପ୍ରତିକ୍ରିୟା ହୁଏ, ସେତେବେଳେ କାର୍ବୋନିକ୍ ଏସିଡ୍ ସୃଷ୍ଟି ହୁଏ। ଏହାଦ୍ୱାରା ସମୁଦ୍ର ଜଳର ପିଏଚ୍ ସ୍ତର କ୍ରମାଗତ ଭାବେ ହ୍ରାସ ପାଇବାରେ ଲାଗିଛି। ସାମୁଦ୍ରିକ ଜୀବନ ଉପରେ ଏହାର କୁପ୍ରଭାବ ଦେଖିବାକୁ ମିଳୁଛି। ସମୁଦ୍ର ଜଳ ଅମ୍ଳୀୟ ହେବା ସହ ଏଥିରେ ଥିବା କାର୍ବୋନେଟ୍ ଆୟନର ମାତ୍ରା କମିଯାଏ। ଏହି କାର୍ବୋନେଟ୍ ସାମୁଦ୍ରିକ ଜୀବ ଓ ପ୍ରବାଳମାନଙ୍କୁ ସେମାନଙ୍କର କଠିନ କୋଷ ଏବଂ କଙ୍କାଳ ତିଆରି କରିବାରେ ସାହାଯ୍ୟ କରିଥାଏ। ଏହାର ଅଭାବରେ ପ୍ରବାଳ ପ୍ରାଚୀରଗୁଡ଼ିକ ଦୁର୍ବଳ ହୋଇ ନଷ୍ଟ ହେବାକୁ ଲାଗିଲେଣି।
Horoscope 2026 September 01: ଜାଣନ୍ତୁ ଆଜିର ରାଶିଫଳ...
ଗେଣ୍ଡା, ଶାମୁକା, କଙ୍କଡ଼ା ଓ ଚିଙ୍ଗୁଡ଼ି ଭଳି ଜୀବମାନଙ୍କର ବାହ୍ୟ ଆବରଣ ତିଆରି ହୋଇପାରୁ ନାହିଁ। ଅମ୍ଳୀୟ ଜଳ ଏତେ ଶକ୍ତିଶାଳୀ ଯେ ଏହା ଏହି ଜୀବମାନଙ୍କର ସୃଷ୍ଟି ହୋଇସାରିଥିବା ଆବରଣକୁ ମଧ୍ୟ ଧୀରେ ଧୀରେ ତରଳାଇ ଦେଉଛି। ଏହା ଖାଦ୍ୟଶୃଙ୍ଖଳାରେ ମଧ୍ୟ ବିପର୍ଯ୍ୟୟ ଆଣିଛି। ସମୁଦ୍ରର କ୍ଷୁଦ୍ର ଜୀବ ଯେପରିକି ‘ଟେରୋପଡ୍’ (ମାଇକ୍ରୋସ୍କୋପିକ୍ ସମୁଦ୍ର ଶାମୁକା) ଏହାଦ୍ୱାରା ବହୁତ ପ୍ରଭାବିତ ହେଉଛନ୍ତି। ଏହି କ୍ଷୁଦ୍ର ଜୀବଗୁଡ଼ିକ ଛୋଟ ମାଛଠାରୁ ଆରମ୍ଭ କରି ବେଲିନ୍ ତିମି ପର୍ଯ୍ୟନ୍ତ ଅନେକ ବଡ଼ ଜୀବଙ୍କର ମୁଖ୍ୟ ଖାଦ୍ୟ। ଏମାନଙ୍କ ସଂଖ୍ୟା କମିଲେ ସମଗ୍ର ସାମୁଦ୍ରିକ ଖାଦ୍ୟଶୃଙ୍ଖଳା ଭାଙ୍ଗିଯିବାର ଆଶଙ୍କା ରହିଛି। ଆହୁରିମଧ୍ୟ ସମୁଦ୍ର ଜଳର ଅମ୍ଳୀକରଣ କେବଳ ଜଳଚର ଜୀବଙ୍କ ମଧ୍ୟରେ ସୀମିତ ନୁହେଁ। ବିଶ୍ୱର କୋଟି କୋଟି ଲୋକ ଜୀବିକା ଓ ଖାଦ୍ୟ ପାଇଁ ସମୁଦ୍ର ଉପରେ ନିର୍ଭର କରନ୍ତି। ମାଛ ଓ ଅନ୍ୟାନ୍ୟ ସାମୁଦ୍ରିକ ଖାଦ୍ୟର ଅଭାବ ଦେଖାଦେଲେ ସାମୁଦ୍ରିକ ମତ୍ସ୍ୟ ଶିଳ୍ପ ବହୁତ ବଡ଼ ଆର୍ଥିକ କ୍ଷତିର ସମ୍ମୁଖୀନ ହେବ।
Climate change: ବିଧାୟକ ସନାତନ ବିଜୁଳିଙ୍କ ଉପସ୍ଥିତିରେ ୫୦୦ରୁ ଊର୍ଦ୍ଧ୍ୱ ଚାରା ରୋପଣ ଓ ବଣ୍ଟନ
ଏହି ସମସ୍ୟାର ସମାଧାନ ହେଉଛି କାର୍ବନ ନିର୍ଗମନକୁ ହ୍ରାସ କରିବା। ଆମକୁ ଜୀବାଶ୍ମ ଜାଳେଣିର ବ୍ୟବହାର କମାଇ ସୌର ଶକ୍ତି ଓ ପବନ ଶକ୍ତି ଭଳି ସବୁଜ ଓ ନବୀକରଣଯୋଗ୍ୟ ଶକ୍ତିର ବ୍ୟବହାର ବଢ଼ାଇବାକୁ ହେବ। ଏହା ସହିତ କୂଳବର୍ତ୍ତୀ ଅଞ୍ଚଳରେ ହେନ୍ତାଳବନ ଓ ସାମୁଦ୍ରିକ ଘାସର ସଂରକ୍ଷଣ କରିବାକୁ ହେବ, ଯାହା ପ୍ରାକୃତିକ ଭାବେ ଅଧିକ କାର୍ବନ ଶୋଷଣ କରିପାରେ। ସମୁଦ୍ରକୁ ବଞ୍ଚାଇବାକୁ ହେଲେ ଆମକୁ ଆଜି ହିଁ ପଦକ୍ଷେପ ନେବାକୁ ହେବ। କାରଣ ସମୁଦ୍ର ସୁସ୍ଥ ରହିଲେ ହିଁ ପୃଥିବୀ ସୁସ୍ଥ ରହିବ।
