5 days ago
6
ARTICLE AD BOX
ହାଇଦ୍ରାବାଦ: ସିକନ୍ଦରାବାଦ୍ କ୍ୟାଣ୍ଟନମେଣ୍ଟସ୍ଥିତ ସୁରକ୍ଷାବଳୟ ମଧ୍ୟରେ ଥିବା ''୨୦ ବାଟାଲିୟନ୍ ମାଦ୍ରାସ ରେଜିମେଣ୍ଟ''ର ମାଗାଜିନ୍ ରୁମରୁ ବହୁ ପରିମାଣର ଅସ୍ତ୍ରଶସ୍ତ୍ର ଓ ୧,୯୦୦ ପ୍ରାୟ ଗୁଳି ଚୋରି ମାମଲାରେ ହାଇଦ୍ରାବାଦ ପୁଲିସ ଜଣେ ଅବସରପ୍ରାପ୍ତ ସେନା ହାବିଲଦାରଙ୍କୁ ଗିରଫ କରିଛି। ଅଭିଯୁକ୍ତ ଜଣକ ୩୭ ବର୍ଷୀୟ ଉପୁଥୋଲା ମଲ୍ଲେଶ ବୋଲି ପୁଲିସ ପକ୍ଷରୁ ଚିହ୍ନଟ କରାଯାଇଛି। ୨୦୧୦ ମସିହାରେ ସେନାରେ ଯୋଗଦେଇଥିବା ମଲ୍ଲେଶ ୨୦୨୬ ଜୁନ୍ ୩୦ରେ ସମୟପୂର୍ବରୁ ଅବସର ନେଇଥିବାରୁ ଅସନ୍ତୁଷ୍ଟ ହୋଇ ଅଗଷ୍ଟ ୩୦ ଓ ୩୧ ତାରିଖ ବିଳମ୍ବିତ ରାତିରେ ଏହି ଚୋରି କରିଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି।
ବିଳମ୍ବିତ ରାତିରେ ଚୋରି
ଚୋରି ହୋଇଥିବା ସାମଗ୍ରୀ ମଧ୍ୟରେ ୪ଟି ଏକେ-୨୦୩ ରାଇଫଲ୍, ୧ଟି ଇନସାସ୍ ରାଇଫଲ୍, ୭ଟି ପିସ୍ତଲ୍, ମାଗାଜିନ୍, ଏକ ନାଇଟ୍-ଭିଜନ୍ ବାଇନୋକୁଲାର୍ ଏବଂ ପ୍ରାୟ ୧,୯୦୦ ରାଉଣ୍ଡ ଗୁଳି ସାମିଲ ଥିଲା। ତେଲେଙ୍ଗାନା ଡିଜିପି ସି.ଭି. ଆନନ୍ଦଙ୍କ ସୂଚନାନୁସାରେ, ଅସ୍ତ୍ରଶସ୍ତ୍ର ଚୋରି କରିବା ପରେ ମଲ୍ଲେଶ ନିଜ କାରରେ ତାହାକୁ ବୋଝେଇ କରି ଆଚମ୍ପେଟ୍ ଆଡ଼କୁ ପଳାୟନ କରିଥିଲା। ପୁଲିସ ଓ ଟୋଲ୍ ଗେଟ୍ ଚେକିଂରୁ ବଞ୍ଚିବା ପାଇଁ ସେ ନିଜ କାରରେ ଯାତ୍ରୀମାନଙ୍କୁ ଭାଡ଼ାରେ ନେଇ ଯାତ୍ରା କରିବା ସହ ଭାଡ଼ା ଆଦାୟ କରି ନିଜର ଯାତ୍ରାକୁ ସାଧାରଣ ବୋଲି ଦର୍ଶାଇବାକୁ ଚେଷ୍ଟା କରିଥିଲା।
ତଦନ୍ତ ପ୍ରକ୍ରିୟା ତୀବ୍ର ହେବାରୁ ଭୟଭୀତ ହୋଇ ସେ ଚୋରି ସାମଗ୍ରୀଗୁଡ଼ିକୁ ସେପ୍ଟେମ୍ବର ୬ରେ ଅନ୍ୟତ୍ର ସ୍ଥାନାନ୍ତର କରିଥିଲା। ତେବେ ସେପ୍ଟେମ୍ବର ୧୦ରେ ସେ ନିଜର ଦୋଷ ସ୍ୱୀକାର କରିବା ପରେ ହାଇଦ୍ରାବାଦ ଟାସ୍କଫୋର୍ସ ଟିମ୍ ଚୋରି ହୋଇଥିବା ସମସ୍ତ ବନ୍ଧୁକ ଓ ଗୁଳି ଜବତ କରିବାରେ ସଫଳ ହୋଇଛି। ଏହି ବଡ଼ ଧରଣର ଚୋରି ପଛର ପ୍ରକୃତ ଉଦ୍ଦେଶ୍ୟ କ’ଣ ଥିଲା, ସେ ନେଇ ପୁଲିସ ଅଧିକ ତଦନ୍ତ ଜାରି ରଖିଛି।
