2 days ago
1
ARTICLE AD BOX
ମୋହାଲି: ଗ୍ରାହକଙ୍କୁ ପ୍ରତିଶ୍ରୁତି ମୁତାବକ ସେବା ଯୋଗାଇବାରେ ବିଫଳ ହେବା ଏବଂ ସେବାରେ ତ୍ରୁଟି ଦେଖାଯିବା ଅଭିଯୋଗରେ ଏକ ଟ୍ରାଭେଲ୍ କମ୍ପାନୀ ଉପରେ କଠୋର ଆଭିମୁଖ୍ୟ ଗ୍ରହଣ କରିଛନ୍ତି ମୋହାଲିସ୍ଥିତ ଜିଲ୍ଲା ଉପଭୋକ୍ତା ବିବାଦ ନିବାରଣ ଆଯୋଗ (Consumer Forum)। ଆବେଦନକାରୀ ଗ୍ରାହକଙ୍କୁ ୧ ଲକ୍ଷ ଟଙ୍କା ଫେରସ୍ତ କରିବା ପାଇଁ ଆଯୋଗ ଉକ୍ତ ଟ୍ରାଭେଲ୍ ଫର୍ମକୁ ନିର୍ଦ୍ଦେଶ ଦେଇଛନ୍ତି।
ମୋହାଲି ଫେଜ୍-୯ର ବାସିନ୍ଦା ମାନବପ୍ରୀତ କୌର 'ୱାର୍ଲ୍ଡ ଟ୍ରାଭେଲ୍ ଆର୍କ' (World Travel Arc) ନାମକ ଏକ ଟ୍ରାଭେଲ୍ କମ୍ପାନୀରୁ ୫ ଲକ୍ଷ ଟଙ୍କାର ଗୋଲ୍ଡ କ୍ଲବ୍ ହୋଲିଡେ ମେମ୍ବରସିପ୍ ନେଇଥିଲେ। ଏଥିପାଇଁ ସେ ୪୨,୫୦୦ ଟଙ୍କା ଡେବିଟ୍ କାର୍ଡ ମାଧ୍ୟମରେ ଦେଇଥିବା ବେଳେ ବାକି ଟଙ୍କା ୧୦ଟି ଇଏମଆଇ (EMI) ମାଧ୍ୟମରେ ପରିଶୋଧ କରିସାରିଥିଲେ।
ଆହୁରି ପଢନ୍ତୁ: AC: ରାସନ୍ କାର୍ଡଧାରୀଙ୍କୁ ମାଗଣାରେ ମିଳିବ ଏୟାର କଣ୍ଡିସନର! ଭାଇରାଲ୍ ଭିଡିଓ ସମ୍ପୂର୍ଣ୍ଣ ମିଛ, ସ୍ପଷ୍ଟ କଲା PIB
ସେପ୍ଟେମ୍ବର ୨୦୧୮ରେ ଧର୍ମଶାଳା ଗସ୍ତ ସମୟରେ ୩ ଦିନ ପରିବର୍ତ୍ତେ ୨ ଦିନର ରହଣି ସୁବିଧା ମିଳିଥିଲା, ଯାହାଫଳରେ ଗୋଟିଏ ଦିନର ଖର୍ଚ୍ଚ ଗ୍ରାହକଙ୍କୁ ନିଜ ପକେଟରୁ ବହନ କରିବାକୁ ପଡ଼ିଥିଲା। ସେହିପରି ଅଗଷ୍ଟ ୨୦୧୯ରେ ମୋର୍ନୀ ହିଲ୍ସ ଓ ଶିମଲା ବୁକିଂ ପାଇଁ ଯୋଗାଯୋଗ କରାଯାଇଥିଲେ ବି କମ୍ପାନୀ ପକ୍ଷରୁ କୌଣସି ସଠିକ୍ ପ୍ରତ୍ୟୁତ୍ତର ମିଳିନଥିଲା। ମସୁରୀ ଗସ୍ତ ସମୟରେ ୪-ଷ୍ଟାର୍ ହୋଟେଲ ଯୋଗାଇବା ପାଇଁ ପ୍ରତିଶ୍ରୁତି ଦିଆଯାଇଥିଲେ ହେଁ ନିମ୍ନମାନର ହୋଟେଲ ଦିଆଯାଇଥିଲା। ଗ୍ରାହକ ଜଣକ ବାରମ୍ବାର କମ୍ପାନୀ ସହ ଯୋଗାଯୋଗ କରିବାକୁ ଚେଷ୍ଟା କରିଥିଲେ ସୁଦ୍ଧା କମ୍ପାନୀ କୌଣସି ସହଯୋଗ କରିନଥିଲା। ଫଳରେ ନିରାଶ ହୋଇ ଗ୍ରାହକ ଜଣକ ଉପଭୋକ୍ତା ଅଦାଲତଙ୍କ ଦ୍ୱାରସ୍ଥ ହୋଇଥିଲେ।
ଶୁଣାଣି ସମୟରେ ଟ୍ରାଭେଲ୍ କମ୍ପାନୀ ନିଜର ପକ୍ଷ ରଖି ସେବା ସର୍ତ୍ତାବଳୀ ନେଇ ଯୁକ୍ତି ଦେଇଥିଲା। ମାତ୍ର ଆଯୋଗ ଗ୍ରାହକଙ୍କ ପ୍ରତି ହୋଇଥିବା ଅସୁବିଧା ଓ ସେବାରେ ତ୍ରୁଟିକୁ ସ୍ୱୀକାର କରି କମ୍ପାନୀକୁ ଦୋଷୀ ସାବ୍ୟସ୍ତ କରିଥିଲେ। ଆଦେଶର ପ୍ରମାଣିତ ନକଲ ମିଳିବାର ୨ ମାସ ମଧ୍ୟରେ ୧ ଲକ୍ଷ ଟଙ୍କା ଫେରସ୍ତ କରିବାକୁ ଆଯୋଗ କମ୍ପାନୀକୁ ନିର୍ଦ୍ଦେଶ ଦେଇଛନ୍ତି। ଯଦି ନିର୍ଦ୍ଧାରିତ ସମୟ ମଧ୍ୟରେ ଏହି ଅର୍ଥ ପ୍ରଦାନ କରାନଯାଏ, ତେବେ କମ୍ପାନୀକୁ ବାର୍ଷିକ ୬ ପ୍ରତିଶତ ସୁଧ ସହ ଏହି ଅର୍ଥ ପରିଶୋଧ କରିବାକୁ ପଡ଼ିବ।
