2 weeks ago
8
ARTICLE AD BOX
ମାନାଗୁଆ: ମଧ୍ୟ ଆମେରିକୀୟ ଦେଶ ନିକାରାଗୁଆର ରାଷ୍ଟ୍ରପତି ଡାନିଏଲ୍ ଓର୍ଟେଗା ଏକ ଚାଞ୍ଚଲ୍ୟକର ନିର୍ବାଚନୀ ଘୋଷଣା କରିଛନ୍ତି ଯାହା ଦେଶ ଏବଂ ବିଶ୍ୱର ଲୋକଙ୍କୁ ଚକିତ କରିଦେଇଛି। ୨୦୦୭ମସିହାରୁ କ୍ଷମତାରେ ଥିବା ଓର୍ଟେଗା ଘୋଷଣା କରିଛନ୍ତି ଯେ, ନିକାରାଗୁଆରେ ଆଉ କୌଣସି ନିର୍ବାଚନ ଅନୁଷ୍ଠିତ ହେବ ନାହିଁ। ଏହାର ଅର୍ଥ ହେଉଛି ଯେ, ଆସନ୍ତା ବର୍ଷ ତାଙ୍କ କାର୍ଯ୍ୟକାଳ ଶେଷ ହେବା ପରେ, ନିର୍ବାଚନ ହେବାର ଚ୍ୟାଲେଞ୍ଜ୍ ଦୂର ହୋଇଯିବ। ଏହା ତାଙ୍କର ଏବଂ ତାଙ୍କ ପତ୍ନୀଙ୍କ କ୍ଷମତାକୁ ଆହୁରି ସୁଦୃଢ଼ ​​କରିବ।
୧୯୮୦ ଦଶକରେ ପ୍ରଥମ ଥର ପାଇଁ ରାଷ୍ଟ୍ରପତି ହୋଇଥିବା ଏବଂ ୨୦୦୭ ମସିହାରୁ ଲଗାତାର ୧୯ ବର୍ଷଧରି କ୍ଷମତାରେ ଥିବା ଓର୍ଟେଗା କହିଛନ୍ତି, ଏହି ଘୋଷଣା ବିରୋଧୀଙ୍କ ପାଇଁ ସମସ୍ତ ରାସ୍ତା ବନ୍ଦ କରିଦେବ। ତେବେ ସେ ଏହି ପଦକ୍ଷେପର କାର୍ଯ୍ୟାନ୍ୱୟନ ବିଷୟରେ କୌଣସି ସୂଚନା ପ୍ରଦାନ କରିନାହାନ୍ତି। ୧୯୭୯ ସାଣ୍ଡିନିଷ୍ଟା ବିପ୍ଳବର ସ୍ମୃତିଚାରଣ କରି ସେ କହିଛନ୍ତି ସରକାର ଏବଂ କ୍ଷମତା ଦଖଲ ପାଇଁ ଆଉ ଦେଶରେ କୌଣସି ନିର୍ବାଚନ ହେବ ନାହିଁ। ଏହି ବିପ୍ଳବରେ ଓର୍ଟେଗା ନିଷ୍ଠୁର ଆନାଷ୍ଟାସିଓ ସୋମୋଜୋଙ୍କ ଏକଛତ୍ରବାଦୀ ଶାସନର ଉତ୍ପାଟନରେ ସାମିଲ ହୋଇଥିଲେ। ଦୁଇ ମାସ ପରେ ପ୍ରଥମ ଥର ପାଇଁ ସାର୍ବଜନୀନ ଭାବରେ ଦେଖାଦେବା ପରେ ସେ କହିଥିଲେ, ୟାଙ୍କି ବା ଆମେରିକୀୟ ଏବଂ ସୋମୋସିଷ୍ଟା ବା ସୋମୋଜା ସମର୍ଥକ ସମର୍ଥିତ ଦଳଗୁଡ଼ିକ ଦେଶରେ କ୍ଷମତାକୁ ଫେରିବାର ଦିନ ଶେଷ ହୋଇଛି। ଏହା କେବେ ହେବ ସମ୍ଭବ ନାହିଁ।
ଶେଷ ନିର୍ବାଚନ ବିବାଦୀୟ ଥିଲା
୨୦୨୧ ମସିହାରେ ଅନୁଷ୍ଠିତ ନିକାରାଗୁଆର ଶେଷ ନିର୍ବାଚନ ବିବାଦୀୟ ଥିଲା। ଓର୍ଟେଗା ବିରୋଧୀ ଦଳର ନେତା ଏବଂ ବଡ଼ ବଡ଼ ବ୍ୟବସାୟୀ ନେତାମାନଙ୍କୁ ବନ୍ଦୀ କରିଥିଲେ ତଥା ତାଙ୍କ ବିନା ଅନ୍ୟ ଭିନ୍ନମତକୁ ଅପରାଧ ଭାବେ ଘୋଷଣା କରିଥିଲେ। ଗତ ବର୍ଷ ଓର୍ଟେଗା ଅନେକ ସାମ୍ବିଧାନିକ ସଂସ୍କାର ମାଧ୍ୟମରେ ତାଙ୍କର କ୍ଷମତାକୁ ଆହୁରି ସୁଦୃଢ଼ ​​କରିଥିଲେ। ଏହି ସଂସ୍କାରଗୁଡ଼ିକ ମଧ୍ୟରେ ତାଙ୍କ ପତ୍ନୀ ରୋଜାରିଓ ମୁରିଲୋଙ୍କୁ ଉପରାଷ୍ଟ୍ରପତି କରିବା ଏବଂ ରାଷ୍ଟ୍ରପତି କାର୍ଯ୍ୟକାଳକୁ ଛଅ ବର୍ଷ ପର୍ଯ୍ୟନ୍ତ ବୃଦ୍ଧି କରିବା ଅନ୍ତର୍ଭୁକ୍ତ ଥିଲା। ସେ ଏବଂ ତାଙ୍କ ପତ୍ନୀ ସଶସ୍ତ୍ର ବାହିନୀ ଏବଂ ନ୍ୟାୟପାଳିକା ସମେତ ସରକାରଙ୍କ ପ୍ରାୟ ପ୍ରତ୍ୟେକ ବିଭାଗକୁ ନିୟନ୍ତ୍ରଣ କରୁଛନ୍ତି।
ଜାତିସଂଘ ମାନବାଧିକାର ପରିଷଦ ଓର୍ଟେଗା ଏବଂ ମୁରିଲୋଙ୍କ ସରକାର ଉପରେ ଦେଶକୁ ଏକଛତ୍ରବାଦୀ ରାଷ୍ଟ୍ରରେ ପରିଣତ କରିଥିବା ଏବଂ ଯୋଜନାବଦ୍ଧ ଭାବରେ ମାନବାଧିକାର ଉଲ୍ଲଂଘନ କରୁଥିବାର ଅଭିଯୋଗ ଆଣିଛି। ଏପ୍ରିଲ ୨୦୧୮ ଠାରୁ ନିକାରାଗୁଆ ଏକ ଗମ୍ଭୀର ରାଜନୈତିକ ସଙ୍କଟ ସହିତ ସଂଘର୍ଷ କରୁଛି। ଓର୍ଟେଗା ସରକାର ବିରୋଧୀ ପ୍ରତିବାଦ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ ଫଳରେ ୩୦୦ରୁ ଅଧିକ ଲୋକଙ୍କ ମୃତ୍ୟୁ ଘଟିଥିଲା।
