2 weeks ago
6
ARTICLE AD BOX
ନୂଆଦିଲ୍ଲୀ:କର୍କଟ ରୋଗର ଚିକିତ୍ସାକୁ ନେଇ ବୈଜ୍ଞାନିକମାନେ ଏକ ଆଶାଜନକ ପଦକ୍ଷେପ ନେଇଛନ୍ତି। କର୍କଟ କୋଷକୁ ଅଧିକ ଲକ୍ଷ୍ୟଭିତ୍ତିକ ଭାବେ ଆକ୍ରମଣ କରିବା ପାଇଁ ଏକ ନୂଆ ‘ସ୍ମାର୍ଟ ଡ୍ରଗ୍’ ବିକଶିତ କରାଯାଇଛି। ଏହି ଔଷଧର ନାମ RK-251। ପାରମ୍ପରିକ କର୍କଟ ଚିକିତ୍ସାରେ ଔଷଧ କେବଳ କର୍କଟ କୋଷ ଉପରେ ନୁହେଁ, ଶରୀରର କିଛି ସୁସ୍ଥ କୋଷ ଉପରେ ମଧ୍ୟ ପ୍ରଭାବ ପକାଉଥିଲା। ଏହି କାରଣରୁ ଅନେକ ଚିକିତ୍ସାରେ ପାର୍ଶ୍ୱପ୍ରତିକ୍ରିୟା ଦେଖାଯାଉଥିଲା।
RK-251ର ବିଶେଷତା ହେଉଛି, ଏହାକୁ କର୍କଟ କୋଷ ଭିତରେ ଅଧିକ ସକ୍ରିୟ ହେବା ଭଳି ଭାବେ ଡିଜାଇନ୍ କରାଯାଇଛି। ଏହା ଭବିଷ୍ୟତରେ ଚିକିତ୍ସାକୁ ଅଧିକ ଲକ୍ଷ୍ୟଭିତ୍ତିକ କରିବାର ଆଶା ସୃଷ୍ଟି କରିଛି।
ଏହି ଗବେଷଣାର ନେତୃତ୍ୱ ନେଇଥିଲେ ଇନଷ୍ଟିଚ୍ୟୁଟ୍ ଅଫ୍ ଆଡଭାନ୍ସଡ୍ ଷ୍ଟଡି ଇନ୍ ସାଇନ୍ସ ଆଣ୍ଡ ଟେକ୍ନୋଲୋଜି (IASST)ର ଡାକ୍ତର ଆସିସ୍ ବାଲା। ସହଯୋଗ କରିଥିଲେ ଗୌହାଟିସ୍ଥିତ IITର ଡାକ୍ତର କେ.ପି. ଭାବକ। IASST ହେଉଛି ବିଜ୍ଞାନ ଓ ପ୍ରଯୁକ୍ତି ମନ୍ତ୍ରଣାଳୟ ଅଧୀନରେ ଥିବା ଏକ ସ୍ୱୟଂଶାସିତ ଗବେଷଣା ପ୍ରତିଷ୍ଠାନ।
RK-251 କ’ଣ ?
ସାଧାରଣ ଟିସୁରେ RK-251 ତୁଳନାତ୍ମକ ଭାବେ ନିଷ୍କ୍ରିୟ ରହିବା ପାଇଁ ଏହାକୁ ପ୍ରସ୍ତୁତ କରାଯାଇଛି। କିନ୍ତୁ କର୍କଟ କୋଷରେ ପହଞ୍ଚିବା ପରେ ଏହା ସକ୍ରିୟ ହେଲା ଭଳି ଡିଜାଇନ୍ କରାଯାଇଛି। କର୍କଟ କୋଷରେ ସାଧାରଣତଃ Reactive Oxygen Species ବା ROSର ସ୍ତର ଅଧିକ ଥାଇପାରେ। ଗବେଷକମାନେ ଏହି ବୈଶିଷ୍ଟ୍ୟକୁ ଔଷଧକୁ ସକ୍ରିୟ କରିବା ପାଇଁ ବ୍ୟବହାର କରିଛନ୍ତି। ସହଜ ଭାଷାରେ ବୁଝିଲେ, RK-251କୁ ଏକ ‘ସ୍ମାର୍ଟ ପ୍ୟାକେଜ୍’ ଭଳି ଭାବିପାରିବା। ଔଷଧଟି କର୍କଟ କୋଷ ଭିତରକୁ ପହଞ୍ଚିବା ପରେ ସେଠାକାର ଅଧିକ ROS ସ୍ତର ଏହାକୁ ସକ୍ରିୟ କରିବାରେ ସାହାଯ୍ୟ କରେ। ଏହା ପରେ NBDHEX ନାମକ ଏକ କର୍କଟବିରୋଧୀ ଏଜେଣ୍ଟ ମୁକ୍ତ ହୁଏ। ଏହା କର୍କଟ କୋଷର ବଞ୍ଚିବା ଓ ଚିକିତ୍ସା ପ୍ରତିରୋଧ ସହ ଜଡ଼ିତ କିଛି ପ୍ରୋଟିନକୁ ଲକ୍ଷ୍ୟ କରେ। ଅର୍ଥାତ୍, ଔଷଧଟି ସମଗ୍ର ଶରୀରରେ ସମାନ ଭାବେ ପ୍ରଭାବ ପକାଇବା ପରିବର୍ତ୍ତେ କେବଳ କର୍କଟ କୋଷକୁ ଚିହ୍ନଟ କରି ସେଠାରେ ସକ୍ରିୟ ହେବାକୁ ଲକ୍ଷ୍ୟ ରଖିଛି।
ଗବେଷକମାନେ ପରୀକ୍ଷାଗାରରେ ସ୍ତନ କର୍କଟ ବିରୁଦ୍ଧରେ RK-251 ପରୀକ୍ଷା କରିଥିଲେ। ଏହି ପରୀକ୍ଷଣ ସମୟରେ କର୍କଟ କୋଷ ଗୁଡ଼ିକ ଉପରେ RK-251 ଔଷଧ ଅଧିକ ପ୍ରଭାବି ହୋଇଥିବା ବେଳେ ସୁସ୍ଥ କୋଷଗୁଡ଼ିକ ଉପରେ କମ୍ ପ୍ରଭାବ ପକାଇଥିଲା। ଗବେଷକମାନେ ଜେବ୍ରାଫିଶ୍ ଭ୍ରୁଣ ଉପରେ ମଧ୍ୟ ଏହି ଔଷଧ ପରୀକ୍ଷା କରିଥିଲେ। ତଥାପି ରୋଗୀମାନଙ୍କଠାରେ ଏହି ଔଷଧ ପରୀକ୍ଷଣ କରିବା ପୂର୍ବରୁ ଅଧିକ ଅଧ୍ୟୟନ ଆବଶ୍ୟକ।
Heart health: ସିଗାରେଟ୍ ହିଁ ନୁହେଁ, ଏହି ୪ଟି ଜିନିଷ ମଧ୍ୟ ହୃଦୟର ଶତ୍ରୁ!
ପାରମ୍ପରିକ କେମୋଥେରାପି କର୍କଟ କୋଷ ଏବଂ ସୁସ୍ଥ କୋଷକୁ କ୍ଷତି ପହଞ୍ଚାଇଥାଏ। RK-251 ର ଫଳାଫଳ ଉତ୍ସାହଜନକ ହେଲେ ମଧ୍ୟ, ମଣିଷଠାରେ ଏହାର ବ୍ୟବହାର ବିଚାର କରିବା ପୂର୍ବରୁ ଅଧିକ ଗବେଷଣା ଆବଶ୍ୟକ। ବୈଜ୍ଞାନିକମାନଙ୍କୁ ଅତିରିକ୍ତ ପରୀକ୍ଷାଗାର ଅଧ୍ୟୟନ ଏବଂ ଶେଷରେ ମଣିଷଙ୍କ ଠାରେ କ୍ଲିନିକାଲ୍ ପରୀକ୍ଷଣ ମାଧ୍ୟମରେ ଏହାର ସୁରକ୍ଷା ଏବଂ ପ୍ରଭାବ ନିଶ୍ଚିତ କରିବାକୁ ପଡିବ। ଏହାର ମୁଖ୍ୟ ଲକ୍ଷ୍ୟ ହେଉଛି ସୁସ୍ଥ ଟିସୁରେ RK-251 ଔଷଧ ନିଷ୍କ୍ରିୟ ରହିବ ଏବଂ କେବଳ କର୍କଟ କୋଷର ସଂସ୍ପର୍ଶରେ ଆସିଲେ ସକ୍ରିୟ ହେବ।
