3 weeks ago
11
ARTICLE AD BOX
କୋଲକାତା: ପଶ୍ଚିମବଙ୍ଗର ବରୁଇପୁରରେ ଜଣେ ୧୨ ବର୍ଷୀୟା ନାବାଳିକାଙ୍କୁ ଦୁଷ୍କର୍ମ ପରେ ହତ୍ୟା କରାଯିବା, ପରେ ଜନତାଙ୍କ ଦ୍ୱାରା ଜଣେ ସନ୍ଦିଗ୍ଧଙ୍କୁ ପିଟିପିଟି ହତ୍ୟା ଏବଂ ଏହି ଘଟଣାକୁ ନେଇ ରାଜନୈତିକ ତର୍କବିତର୍କ ନୂଆ ବିଜେପି ସରକାର ପାଇଁ ପ୍ରଥମ ବଡ଼ ଆଇନଶୃଙ୍ଖଳା ଚ୍ୟାଲେଞ୍ଜ ସୃଷ୍ଟି କରିଛି। ବିରୋଧୀ ନେତ୍ରୀ ମମତା ବାନାର୍ଜୀ ଏହାକୁ ନେଇ ସରକାରଙ୍କ ବିରୋଧରେ ଆକ୍ରମଣ ଜୋରଦୋର କରିଥିବା ବେଳେ, ପୁଲିସର ବିଳମ୍ବିତ କାର୍ଯ୍ୟାନୁଷ୍ଠାନକୁ ନେଇ ମଧ୍ୟ ପ୍ରଶ୍ନ ଉଠିଛି।
ଜୁଲାଇ ୪ ତାରିଖ ଅପରାହ୍ଣରେ ସାଙ୍ଗର ଜନ୍ମଦିନ ପାଇଁ ଉପହାର କିଣିବାକୁ ଘରୁ ବାହାରିଥିବା ନାବାଳିକା ଘରକୁ ଫେରି ନ ଥିଲେ। ରାତି ପ୍ରାୟ ୯ଟାରେ ପରିବାର ପକ୍ଷରୁ ନିଖୋଜ ଅଭିଯୋଗ କରାଯାଇଥିଲେ ମଧ୍ୟ ପୁଲିସ ତୁରନ୍ତ ସକ୍ରିୟ ହୋଇ ନ ଥିବା ଅଭିଯୋଗ କରିଛନ୍ତି ପରିବାର ଲୋକ। ପରେ ସ୍ଥାନୀୟ ଲୋକେ ସିସିଟିଭି ଯାଞ୍ଚ କରି ଦୁଇ ଯୁବକଙ୍କୁ ଚିହ୍ନଟ କରିଥିଲେ। ସେମାନଙ୍କ ମଧ୍ୟରୁ ଜଣଙ୍କୁ ପଚରାଉଚରା କରିବା ପରେ ନାବାଳିକାଙ୍କ ମୃତଦେହ ପୋଖରୀରେ ବସ୍ତା ଭିତରୁ ଉଦ୍ଧାର କରାଯାଇଥିଲା।
ପ୍ରାରମ୍ଭିକ ଶବବ୍ୟବଚ୍ଛେଦ ରିପୋର୍ଟରେ ନାବାଳିକାଙ୍କୁ ଯୌନ ନିର୍ଯାତନା ପରେ ହତ୍ୟା କରାଯାଇଥିବା ସୂଚନା ମିଳିଛି। ମୁଣ୍ଡରେ ଭାରୀ ବସ୍ତୁରେ ଆଘାତ କରିବା ପରେ ତାଙ୍କୁ ବସ୍ତାରେ ପୂରାଇ ପୋଖରୀରେ ଫିଙ୍ଗି ଦିଆଯାଇଥିଲା। ଫୁସଫୁସ ଓ ପାକସ୍ଥଳୀରେ ପାଣି ଥିବାରୁ ପୋଖରୀରେ ପକାଯିବା ବେଳେ ସେ ଜୀବିତ ଥିବା ସନ୍ଦେହ କରାଯାଉଛି। ନାବାଳିକାଙ୍କ ମା’ କହିଛନ୍ତି, ପୁଲିସ ଯଦି ଠିକ୍ ସମୟରେ ତଦନ୍ତ ଆରମ୍ଭ କରିଥାନ୍ତା, ହୁଏତ ତାଙ୍କ ଝିଅର ଜୀବନ ବଞ୍ଚିପାରିଥାନ୍ତା।
ଘଟଣା ପରେ ବରୁଇପୁରରେ ଉତ୍ତେଜନା ଦେଖାଦେଇଥିଲା। ବିକ୍ଷୋଭକାରୀମାନେ ଟାୟାର ଜାଳି ରାସ୍ତା ଅବରୋଧ କରିବା ସହ ପୁଲିସ ଗାଡ଼ି ଭଙ୍ଗାରୁଜା କରିଥିଲେ। ଏହି ସମୟରେ ଇନ୍ଦ୍ରଜିତ ତନ୍ତୀ ନାମକ ଜଣେ ଯୁବକଙ୍କୁ ଅପରାଧରେ ସମ୍ପୃକ୍ତ ସନ୍ଦେହରେ ଉତ୍ତ୍ୟକ୍ତ ଲୋକେ ପିଟିପିଟି ହତ୍ୟା କରିଥିଲେ। ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଏହି ଘଟଣାରେ ସାମ୍ପ୍ରଦାୟିକ ଦିଗ ଥିବା କହି ହିଂସାରେ ଜଡ଼ିତ ଲୋକଙ୍କ ବିରୋଧରେ କଠୋର ପଦକ୍ଷେପ ନେବାକୁ ଚେତାବନୀ ଦେଇଛନ୍ତି। ସୋମବାର ପୁଲିସ ମୁଖ୍ୟ ଅଭିଯୁକ୍ତ ଆନନ୍ଦ ସର୍ଦ୍ଦାରଙ୍କ ସମେତ ତିନିଜଣଙ୍କୁ ଗିରଫ କରିଥିବାବେଳେ ଆଉ ଜଣେ ଫେରାର ଅଛନ୍ତି। ସ୍ଥାନୀୟ ଲୋକେ ଅଭିଯୋଗ କରିଛନ୍ତି, ଆନନ୍ଦଙ୍କୁ ଧରି ପୁଲିସକୁ ଦେବା ପରେ ସେ ପୁଲିସ ପାଖରୁ ରହସ୍ୟଜନକ ଭାବେ ଗାଏବ ହୋଇଯାଇଥିଲା। ଏହାଛଡ଼ା ବିଜେପି ନେତା ଶାନ୍ତନୁ ମଣ୍ଡଳ ଜଣେ ଅଭିଯୁକ୍ତଙ୍କୁ ଖସାଇବାକୁ ଚେଷ୍ଟା କରିଥିବା ଅଭିଯୋଗ ହୋଇଥିଲେ ମଧ୍ୟ ସେ ଏହାକୁ ଖଣ୍ଡନ କରି ପୁଲିସକୁ ସହଯୋଗ କରୁଥିବା କହିଛନ୍ତି।
Woman Death: ବିବାହିତା ମହିଳାଙ୍କୁ ଦୁଷ୍କର୍ମ ପରେ ହତ୍ୟା, ଅଭିଯୁକ୍ତ ଅଟକ
ଏହି ଘଟଣାକୁ ନେଇ ମମତା ବାନାର୍ଜୀ ସରକାରଙ୍କୁ ତୀବ୍ର ସମାଲୋଚନା କରିଛନ୍ତି। ସେ ନିଜକୁ ଗୃହବନ୍ଦୀ ରଖାଯାଇଥିବା ଅଭିଯୋଗ କରି କ୍ୟାଣ୍ଡେଲ ରାଲିର ନେତୃତ୍ୱ ନେଇଥିଲେ। ତୃଣମୂଳ କଂଗ୍ରେସ ଅଭିଯୋଗ କରିଛି, ପୀଡ଼ିତାଙ୍କ ପରିବାରକୁ ଭେଟିବାରୁ ମମତାଙ୍କୁ ରୋକିବା ପାଇଁ ତାଙ୍କ ବାସଭବନ ଚାରିପାଖରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା। ତେବେ ବିଜେପି ଏହାକୁ ତାଙ୍କ ଜେଡ୍-ପ୍ଲସ୍ ସୁରକ୍ଷା ବ୍ୟବସ୍ଥାର ନିୟମିତ ଅଂଶ ବୋଲି କହିଛି।
