2 weeks ago
10
ARTICLE AD BOX
ୱାସିଂଟନ:ବାମପନ୍ଥୀ ଉଗ୍ରବାଦ ଏବଂ ରାଜନୈତିକ ଆତଙ୍କବାଦର ମୁକାବିଲା ପାଇଁ ଆମେରିକା ଏକ ବଡ଼ ଧରଣର ମନ୍ତ୍ରିସ୍ତରୀୟ ବୈଠକ ଡାକିଥିଲା। ଭାରତ ସମେତ ୬୭ଟି ଦେଶ ଏହି ବୈଠକରେ ଅଂଶଗ୍ରହଣ କରିଥିଲେ। ଆମେରିକାରେ ଭାରତୀୟ ରାଷ୍ଟ୍ରଦୂତ ବିନୟ କ୍ୱାତ୍ରା ଏହି ବୈଠକରେ ଭାରତର ପ୍ରତିନିଧିତ୍ୱ କରିଥିଲେ। ବିଦେଶ ମନ୍ତ୍ରୀ ଏସ୍ ଜୟଶଙ୍କର ଗସ୍ତରେ ଥିବାରୁ ଏଥିରେ ଯୋଗ ଦେଇପାରି ନଥିଲେ। ବୈଠକରେ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ ବାମପନ୍ଥୀ ଆତଙ୍କବାଦ ବିରୋଧରେ ସମସ୍ତ ଦେଶ ଏକଜୁଟ ହେବା ପାଇଁ ଆହ୍ୱାନ ଦେଇଥିଲେ। ସେ କହିଥିଲେ ଯେ ଆଜିର ବାମପନ୍ଥୀ ଆତଙ୍କବାଦୀମାନେ ବିଭିନ୍ନ ଦେଶରେ କାର୍ଯ୍ୟ କରୁଛନ୍ତି। ସେମାନେ ଗୋଟିଏ ଦେଶରେ ଟଙ୍କା ସଂଗ୍ରହ କରୁଛନ୍ତି, ଅନ୍ୟ ଦେଶର ସହ ଯୋଗାଯୋଗ ବଜାୟ ରଖୁଛନ୍ତି। ସେହିପରି ତୃତୀୟ ଦେଶରେ ତାଲିମ ପାଉଛନ୍ତି, ଚତୁର୍ଥ ଦେଶରେ ଆତଙ୍କବାଦୀଙ୍କୁ ନିଯୁକ୍ତି ଦେଉଛନ୍ତି ଏବଂ ପଞ୍ଚମ ଦେଶରେ ଏକକାଳୀନ ଆକ୍ରମଣ ଆରମ୍ଭ କରୁଛନ୍ତି। ତେଣୁ ଆମକୁ ଏହି ବିପଦ ସହିତ ମିଳିତ ଭାବରେ ଲଢ଼ିବାକୁ ପଡିବ। ରୁବିଓ ଦାବି କରିଛନ୍ତି ଯେ ଆମେରିକା ଏବଂ ୟୁରୋପୀୟ ଆତଙ୍କବାଦ ବିରୋଧୀ ନୀତି ଯୋଗୁଁ ଜିହାଦୀ ଆତଙ୍କବାଦର ବିପଦ ଯଥେଷ୍ଟ ହ୍ରାସ ପାଇଛି। ସେ କହିଛନ୍ତି ଯେ, ଜିହାଦୀ ବିପଦ ଦୂର ହୋଇନାହିଁ, କିନ୍ତୁ ପୂର୍ବ ଅପେକ୍ଷା ଏହା କମ୍ ହୋଇଛି।
ବାମପନ୍ଥୀ ଉଗ୍ରବାଦ ସହିତ ସଂଘର୍ଷ: ଭାରତ
ଭାରତର ପ୍ରତିନିଧିତ୍ୱ କରୁଥିବା ରାଷ୍ଟ୍ରଦୂତ ବିନୟ କ୍ୱାତ୍ରା କହିଥିଲେ ଯେ, ଭାରତ ଦୀର୍ଘ ଦିନ ଧରି ବାମପନ୍ଥୀ ଉଗ୍ରବାଦ ସହିତ ସଂଘର୍ଷ କରିଆସୁଛି। ସେ ଗୁରୁତ୍ୱାରୋପ କରିଥିଲେ, ଭାରତ ସୀମାପାର ଆତଙ୍କବାଦ ଏବଂ ବିଚ୍ଛିନ୍ନତାବାଦକୁ ପ୍ରୋତ୍ସାହିତ କରୁଥିବା ଗୋଷ୍ଠୀ ସମେତ ସମସ୍ତ ପ୍ରକାରର ଆତଙ୍କବାଦ ବିରୋଧରେ ଶୂନ୍ୟ ସହନଶୀଳତା ନୀତି ବଜାୟ ରଖିଛି। ଭାରତ ପାଇଁ ଚିନ୍ତାର ବିଷୟ ହେଉଛି ଯେ, ରୁବିଓ ଜିହାଦୀ ଆତଙ୍କବାଦର ବିପଦକୁ ଗୁରୁତ୍ୱହୀନ ଭାବରେ ଗ୍ରହଣ କରିଥିଲେ। ରୁବିଓ ଉଗ୍ରବାଦୀ ଇସଲାମିକ ଉଗ୍ରବାଦର ବିପଦକୁ କମ୍ ମନେ କରି ଚୁପ୍ ରହିଥିଲେ ଏବଂ ବାମପନ୍ଥୀ ଆତଙ୍କବାଦର ବିପଦ ବିଷୟରେ କହିଥିଲେ। ସେ କହିଥିଲେ, ଆମେରିକା ଏବଂ ୟୁରୋପ ଦ୍ୱାରା ଗ୍ରହଣ କରାଯାଇଥିବା ସଫଳ ଆତଙ୍କବାଦ ବିରୋଧୀ ରଣନୀତି ଯୋଗୁଁ ଜିହାଦୀ ଆତଙ୍କବାଦର ବିପଦ ହ୍ରାସ ପାଇଛି। ତଥାପି, ଭାରତ ପାଇଁ, ଜିହାଦୀ ବିପଦ ଏକ ଦଶନ୍ଧି ପୂର୍ବେ ଯେପରି ଶକ୍ତିଶାଳୀ ଥିଲା ,ଏବେ ମଧ୍ୟ ସେଭଳି ରହିଛି। ୨୦୨୫ ପହଲଗାମ ଆତଙ୍କବାଦୀ ଆକ୍ରମଣରୁ ଏହା ସ୍ପଷ୍ଟ ହୋଇଛି।
Rath Yatra: ମ୍ୟୁନିଖରେ ମହାସମାରୋହରେ ପାଳିତ ହେଲା ଶ୍ରୀଜଗନ୍ନାଥ ରଥଯାତ୍ରା
ରୁବିଓ କହିଛନ୍ତି, ଯେପର୍ଯ୍ୟନ୍ତ ପ୍ରବାସ ବ୍ୟବସ୍ଥାରେ ତ୍ରୁଟି ରହିବ, ସେପର୍ଯ୍ୟନ୍ତ ଜିହାଦୀ ବିପଦ ଜାରି ରହିବ। ବୈଠକରେ ଆମେରିକା ସ୍ପଷ୍ଟ କରିଛି ଯେ, ବାଣିଜ୍ୟ କିମ୍ବା ପ୍ରବାସ ଭଳି ପ୍ରସଙ୍ଗରେ ମତଭେଦ ଯାହା ହେଉନା କାହିଁକି, ଏବେ ବିଶ୍ୱକୁ ବାମପନ୍ଥୀ ହିଂସା ବିରୋଧରେ ଏକାଠି ହେବାକୁ ପଡିବ।
