14 hours ago
2
ARTICLE AD BOX
ନୂଆଦିଲ୍ଲୀ:ଭାରତ ସରକାର ଆମେରିକା କଂଗ୍ରେସରେ ରୁଷ ଏବଂ ଇରାନ ଉପରେ ନୂତନ କଟକଣା ଲଗାଇବା ପାଇଁ ଆଇନ ଗୃହୀତ ହେବା ପରେ ମନ୍ତବ୍ୟ ଜାରି କରିଛନ୍ତି। ଭାରତ କହିଛି, ଆମେ ଏହି ମାମଲାରେ ସ୍ଥିତି ଉପରେ ତୀକ୍ଷ୍ଣ ନଜର ରଖିଛୁ। ଭାରତ ସ୍ପଷ୍ଟ କରିଛି, ଦେଶର ୧୪୦ କୋଟିରୁ ଅଧିକ ଲୋକଙ୍କର ଶକ୍ତି ଆବଶ୍ୟକତା ପୂରଣ କରିବା ଆମର ପ୍ରାଥମିକତା ବୋଲି ବୈଦେଶିକ ମନ୍ତ୍ରଣାଳୟ ଗୁରୁବାର ପ୍ରତିକ୍ରିୟା ଦେଇଛି।
ପରିବର୍ତ୍ତିତ ବଜାର ଆଧାରରେ ନିଷ୍ପତ୍ତି
ଭାରତ ନିଜର ଶକ୍ତି ସୁରକ୍ଷା ସୁନିଶ୍ଚିତ କରିବା ପାଇଁ ବିଭିନ୍ନ ଦେଶରୁ ତେଲ ଏବଂ ଗ୍ୟାସ୍ କ୍ରୟ ଜାରି ରଖିବ ଏବଂ ପରିବର୍ତ୍ତିତ ବଜାର ଆଧାରରେ ନିଷ୍ପତ୍ତି ନେବ। ଏହି ପ୍ରସଙ୍ଗରେ ଗତ କିଛି ମାସ ମଧ୍ୟରେ ଆମେରିକୀୟ ଅଧିକାରୀଙ୍କ ସହିତ ଉଚ୍ଚସ୍ତରୀୟ ଆଲୋଚନା ହୋଇଥିବା ଭାରତ କହିଛି।ଭାରତ ଆମେରିକାକୁ ଏହା ମଧ୍ୟ ଜଣାଇଛି ଯେ, ଏହି ପ୍ରତିବନ୍ଧକଗୁଡ଼ିକ କେବଳ ଭାରତ-ଆମେରିକା ସମ୍ପର୍କକୁ ନୁହେଁ ବରଂ ସମଗ୍ର ଅନ୍ତର୍ଜାତୀୟ ଶକ୍ତି ବଜାରକୁ ମଧ୍ୟ ପ୍ରଭାବିତ କରିବାର ଆଶଙ୍କା ରହିଛି। ନିଜର ବାଣିଜ୍ୟ ଏବଂ ଅର୍ଥନୈତିକ ସ୍ୱାର୍ଥକୁ ସୁରକ୍ଷା ଦେବା ପାଇଁ ଭାରତ ଆବଶ୍ୟକୀୟ ପଦକ୍ଷେପ ନେବ।
ଉଲ୍ଲେଖନୀୟ, ଆମେରିକା କଂଗ୍ରେସ ରୁଷରୁ ତେଲ କିଣୁଥିବା ଦେଶମାନଙ୍କ ଉପରେ ୧୦୦ ପ୍ରତିଶତ ଶୁଳ୍କ ଲାଗୁ କରିବା ପାଇଁ ଏକ ବିଲ୍ ପାରିତ କରିଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସ୍ୱାକ୍ଷର ପରେ ଏହି ଆଇନ କାର୍ଯ୍ୟକାରୀ ହେବ। ଭାରତ ଏବଂ ଚୀନ୍ ସମେତ ଅନେକ ଦେଶ ରୁଷରୁ ତେଲ କିଣନ୍ତି। ଆମେରିକାରେ ନୂତନ ଆଇନ ପାରିତ ହେବା ଦ୍ୱାରା ଟ୍ରମ୍ପଙ୍କୁ ୧୦୦ ପ୍ରତିଶତ ଶୁଳ୍କ ଲାଗୁ କରିବାର ଅଧିକାର ମିଳିଛି। ଭାରତ ଦୀର୍ଘ ଦିନ ଧରି ରୁଷଠାରୁ ଶସ୍ତା ତେଲ କିଣି ନିଜର ଶକ୍ତି ଆବଶ୍ୟକତା ପୂରଣ କରିଆସୁଛି, କିନ୍ତୁ ଏବେ ଆମେରିକା ଏହି ତେଲ କ୍ରୟ ନେଇ ଭାରତ ଉପରେ ଚାପ ବୃଦ୍ଧି କରିବାକୁ ଚେଷ୍ଟା କରୁଛି।
