1 day ago
2
ARTICLE AD BOX
ରିତେନ୍ଦ୍ର ଛାଟୋଇ
ବାଲେଶ୍ବର: ‘ଲଗାଣ ବର୍ଷା ଓ ବନ୍ୟା ପାଇଁ ଦୁଇସପ୍ତାହ ଧରି ଧାନତଳି ପାଣିରେ ବୁଡ଼ି ରହିଲା। ଗତକାଲି ପାଣି ଛାଡ଼ିବା ପରେ ଆଜି ବିଲକୁ ଆସୁଛି। ବିଲରେ ଆଉ ତଳି ନାହିଁ। ଏବର୍ଷ ମୋ ଚାଷ ବୁଡ଼ିଲା। ଘରେ ବିହନ ବି ନାହିଁ। ଏବେ ବିହନ କେଉଁଠୁ ଆଣିବି। ମତେ କିଏ ସହାୟତା ଦେବ, ପିଲାଙ୍କ ମୁହଁରେ କିଏ ଆହାର ଦେବ।’ ହିଡ଼ମୁଣ୍ଡରେ ବସି କୋହଭରା କଣ୍ଠରେ ଏମିତି କହିଛନ୍ତି ବାଲେଶ୍ବର ଜିଲ୍ଲା ସଦର ବ୍ଳକ୍ ଗେଙ୍ଗୁଟି ପଞ୍ଚାୟତ ଅନ୍ତର୍ଗତ ପାଖରାସାଉଁର ପାଣୁଆ ସିଂ(୭୦)। ସେପଟେ, ପାଖଜମିରେ ପୁଣି ତଳି ପକାଇବାକୁ ପ୍ରସ୍ତୁତି କରୁଥିବା କହିଛନ୍ତି ସେହି ଗ୍ରାମର ଶ୍ୟାମସୁନ୍ଦର ସିଂ। ଚାଷକାର୍ଯ୍ୟ ଆରମ୍ଭରୁ ଅଚାନକ ବନ୍ୟା କାହା ମୁଣ୍ଡରେ ଚଡ଼କ ସଦୃଶ ହୋଇଥିବା ବେଳେ ଆଉ କିଏ ଏହି ବିପର୍ଯ୍ୟୟ ଭିତରୁ ମୁକୁଳି ପୁଣିଥରେ ଅଣ୍ଟା ସଳଖିବାକୁ ସଜବାଜ ହେଉଛି। ‘ଗ୍ରାଉଣ୍ଡ ଜିରୋ’ରୁ ତଥ୍ୟ ସଂଗ୍ରହ ବେଳେ ଏଭଳି କିଛି ଦୃଶ୍ୟ ଦେଖିବାକୁ ମିଳିଛି।
Excise Raid: ଅବକାରୀ ବିଭାଗର ବିଭିନ୍ନ ସ୍ଥାନରେ ଚଢ଼ଉ, ଗଞ୍ଜେଇ-ମଦ ଜବତ
ବୁଢ଼ାବଳଙ୍ଗ, ଜଳକା ନଦୀ ବନ୍ୟାରେ ବାଲେଶ୍ବର ଜିଲ୍ଲାର ସଦର ବ୍ଲକରେ ବ୍ୟାପକ ଭାବେ ଧାନତଳି, ରୁଆଧାନ ନଷ୍ଟ ହୋଇଯାଇଛି। ବନ୍ୟାପାଣି କମୁଥିଲେ ମଧ୍ୟ ଚାଷୀମାନେ କେମିତି ଏହି ସମସ୍ୟାରୁ ମୁକୁଳିବେ, ବାଟ ପାଉନାହାନ୍ତି। କେବଳ ଗେଙ୍ଗୁଟି ନୁହେଁ, ପାଖ ଶାସଙ୍ଗ ପଞ୍ଚାୟତରେ ମଧ୍ୟ ସମାନ ଅବସ୍ଥା। ଏହି ପଞ୍ଚାୟତ ଅନ୍ତର୍ଗତ ଜଗନ୍ନାଥପାଟଣାର ବସନ୍ତ ବେହେରା କହିଛନ୍ତି, ତାଙ୍କର ଦୁଇଟି କିଆରି ତଳି ନଷ୍ଟ ହୋଇଥିବା ବେଳେ ଆଉଥରେ ତଳି ପକାଇବାକୁ ବିହନ ନାହିଁ। ପୂର୍ବରୁ ଯେଉଁ ବିହନ ହଜାରେ ଟଙ୍କାରେ ମିଳୁଥିଲା, ଏବେ ବନ୍ୟା କାରଣରୁ ବ୍ୟବସାୟୀ ତା’ର ଦର ୧୫୦୦ ରୁ ୨୦୦୦ ଟଙ୍କା ବଢ଼ାଇ ଦେଇଛନ୍ତି। ବନ୍ୟା କାରଣରୁ ଚାଷୀକୁ ଏବେ ଚାଷ ପାଇଁ ଦୁଇଗୁଣା ଖର୍ଚ୍ଚ କରିବାକୁ ପଡ଼ିବ। ହାତରେ ବି ସମ୍ବଳ ନାହିଁ, ଏବର୍ଷ କେମିତି ଚାଷ କରିବୁ ବୋଲି ସେ ପ୍ରଶ୍ନ କରିଛନ୍ତି। ଉକ୍ତ ଗ୍ରାମର ବାସନ୍ତୀ ବେହେରା ନିଜ ଜମି ଦେଖିବାକୁ ଯାଉଥିବା ବେଳେ ତାଙ୍କୁ ‘ସମ୍ବାଦ ଟିମ୍’ ଭେଟିଥିଲେ। ସେ ମଧ୍ୟ ସରକାର ବିହନ ଯୋଗାଇବାର ବ୍ୟବସ୍ଥା କରନ୍ତେନି କି ବୋଲି ପ୍ରଶ୍ନ କରିଥିଲେ।
Flood In Bhadrak: ବୁଡ଼ିଗଲା ଚାଷଜମି, ଯନ୍ତ୍ରଣାରେ ମୁଣ୍ଡରେ ହାତଦେଇ ବସିଛନ୍ତି ଲୋକେ
ସରକାରୀ ସୂଚନା ମୁତାବକ, ବାଲେଶ୍ବର ସଦରରେ ୩୮୦ ହେକ୍ଟର ଜମିର ତଳି, ୧୧୦୦୦ ହେକ୍ଟରର ଧାନ ପାଣିରେ ବୁଡ଼ି ରହିଛି। ବାସ୍ତବ ଚିତ୍ର କହୁଛି, ଏହାଠାରୁ ଢେର୍ ଅଧିକ ଧାନଜମି ପାଣିରେ ବୁଡ଼ି ରହିଥିବା ବେଳେ କେଉଁଠି ପଚି ନଷ୍ଟ ହୋଇଯାଇଛି ତ ଆଉ କେଉଁଠି ସୁଅରେ ଭାସି ଯାଇଛି। ଏବେ ପୁଣିଥରେ ମୂଳରୁ ଚାଷ ଆରମ୍ଭ କରିବାକୁ ଥିବାରୁ ପାରମ୍ପରିକ ବିହନ ବଦଳରେ ଉନ୍ନତ କିସମର ବିହନର ଆବଶ୍ୟକତା ରହିଛି ବୋଲି ଶାସଙ୍ଗର ବଡ଼ଚାଷୀ କାର୍ତ୍ତିକଚନ୍ଦ୍ର ମଲ୍ଲିକ କହିଛନ୍ତି। ୫୦ କେଜିର ତଳି ସେ ପକାଇଥିବା ବେଳେ ବୁଢ଼ାବଳଙ୍ଗ ବନ୍ୟା ସବୁ ଧୋଇ ନେଇଛି। ସେହିପରି ରସାଳପୁରରେ ସ୍ଥିତି ଗମ୍ଭୀର ଥିବା ଏବଂ ଏବେ ବି ସେଠାରେ ଚାଷଜମି ପାଣିରେ ବୁଡ଼ି ରହିଥିବା ଦେଖିବାକୁ ମିଳିଥିଲା। କାଳେ ପାଣି ଛାଡ଼ିଥିବ ଆଶାରେ ଚାଷୀ ବାରମ୍ବାର ଆସି ରାସ୍ତାରୁ ନିଜ ଜମିକୁ ଦେଖି ଫେରିଯାଉଛି। ଉକ୍ତ ପଞ୍ଚାୟତ ଭୀମପୁରର ଚାଷୀ ଲକ୍ଷ୍ମୀଧର ବେହେରା କହିଛନ୍ତି, ‘୮୦ କେଜି ତଳି ପକାଇଥିଲି। ତଳି ବାହାରି ଆସୁଥିବା ବେଳେ ସପ୍ତାହେ ହେଲାଣି ଜମି ବୁଡ଼ି ରହିଛି। ଜମିକୁ ଦେଖିଲେ ଆଖିରୁ ଲୁହ ଆସିଯାଉଛି।’ ଚାଷୀ ରମେଶ ଚନ୍ଦ୍ର ରଣା, ପଞ୍ଚୁଆ ଦଳେଇ ମଧ୍ୟ ସମାନ କଥା କହିଛନ୍ତି। ବିହନ ସମସ୍ୟା ପ୍ରତି ପ୍ରଶାସନ ଧ୍ୟାନ ଦେବାକୁ ଦାବି କରିଛନ୍ତି।
