4 weeks ago
15
ARTICLE AD BOX
ବାହାଦୂରଗଡ଼: ଦିଲ୍ଲୀ ପୋଲିସର ସ୍ପେଶାଲ ସେଲ୍ ଓ ହରିଆଣା ପୋଲିସର ସ୍ପେଶାଲ ଟାସ୍କ ଫୋର୍ସର ଏକ ମିଳିତ ଅପରେସନ ବେଳେ ଶନିବାର ବିଳମ୍ଵିତ ରାତିରେ ବାହାଦୂରଗଡ଼ ଅଞ୍ଚଳରେ ଲରେନ୍ସ ବିଷ୍ଣୋଇ ଅପରାଧୀ ସଙ୍ଗଠନର ଦୁଇ ଜଣ ଦୁର୍ଦ୍ଦାନ୍ତ ସଦସ୍ୟ ପୋଲିସ ଗୁଳିରେ ପ୍ରାଣ ହରାଇଛନ୍ତି। ଗୁପ୍ତଚର ସୂଚନା ଆଧାରରେ ହରିଆଣାର ହିସାର ବାସିନ୍ଦା ପ୍ରବେଶ ଓ ହିମାଂଶୁ ନାମକ ଦୁଇ ଜଣ ମୋଷ୍ଟ ୱାଣ୍ଟେଡ୍ ଅପରାଧୀ ସେହି ଅଞ୍ଚଳରେ କୌଣସି ବଡ଼ ଅପରାଧ ଘଟାଇବା ଉଦ୍ଦେଶ୍ୟରେ ବୁଲୁଥିବା ବେଳେ ମିଳିତ ପୋଲିସ ବାହିନୀ ସେମାନଙ୍କୁ ଚାରିପଟୁ ଘେରି ଯାଇଥିଲେ।
ପୋଲିସ ଅଫିସର ପ୍ରମୋଦ କୁଶୱା ଏବଂ ଏସପି ବିକ୍ରାନ୍ତ ଭୂଷଣଙ୍କ ସୂଚନା ଅନୁଯାୟୀ, ଅଭିଯୁକ୍ତମାନଙ୍କୁ ଆତ୍ମସମର୍ପଣ କରିବାକୁ କୁହାଯାଇଥିଲେ ମଧ୍ୟ ସେମାନେ ପ୍ରଥମେ ପୋଲିସ ଉପରକୁ ଗୁଳି ଚଳାଇଥିଲେ, ଯାହାର ଜବାବରେ ପୋଲିସ ଦଳ ଆତ୍ମରକ୍ଷା ପାଇଁ ପାଲଟା ଗୁଳି ଚଳାଇଥିଲା। ଏହି ଗୁଳିବିନିମୟ ମଧ୍ୟରେ ଦୁଇଜଣ ଯାକ ଅପରାଧୀ ଗୁରୁତର ଭାବେ ଆହତ ହୋଇଥିଲେ ଏବଂ ପରେ ଡାକ୍ତରଖାନାରେ ସେମାନଙ୍କର ମୃତ୍ୟୁ ଘଟିଥିବା ବେଳେ ଦିଲ୍ଲୀ ପୋଲିସର କାଉଣ୍ଟର ଇଣ୍ଟେଲିଜେନ୍ସ ୟୁନିଟର କନଷ୍ଟେବଳ ଅଙ୍କିତଙ୍କ ଗୋଡ଼ରେ ଏକ ଗୁଳି ବାଜି ସେ ବର୍ତ୍ତମାନ ଚିକିତ୍ସିତ ହେଉଛନ୍ତି।
ଆହୁରି ପଢନ୍ତୁ: RajatPatidar: ପଟିଦାରଙ୍କ ପାଇଁ ପାଟି ଖୋଲିଲେ ପଠାନ୍
ମୃତ ଅଭିଯୁକ୍ତ ଦ୍ୱୟ ଗତ ଜୁନ୍ ୧୧ ତାରିଖରେ ହରିଆଣାର ହାନ୍ସି ଅଞ୍ଚଳରେ ଜଣେ ଜିମ୍ ମାଲିକ କପିଲଙ୍କୁ ଦିନଦ୍ୱିପ୍ରହରରେ ସର୍ବସାଧାରଣରେ ଗୁଳି କରି ହତ୍ୟା କରିବା ମାମଲାରେ ଫେରାର୍ ଥିଲେ, ଯାହାର ସମ୍ପୂର୍ଣ୍ଣ ଦୃଶ୍ୟ ସେଠାକାର ସିସିଟିଭି କ୍ୟାମେରାରେ କଏଦ ହୋଇଥିଲା। ଏହି ନୃଶଂସ ହତ୍ୟାକାଣ୍ଡ ପରେ ହରିଆଣା ପୋଲିସ ଦୁହିଁଙ୍କ ଗିରଫଦାରୀ ଉପରେ ଏକ ଏକ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲା। ଏହି ଦୁଇ ଜଣ ଲରେନ୍ସ ବିଷ୍ଣୋଇ, ହରିରାମ ଓରଫ୍ ହ୍ୟାରୀ ବକ୍ସର ଏବଂ ଅନିଲ ପଣ୍ଡିତଙ୍କ ଆନ୍ତଃରାଜ୍ୟ ଅପରାଧିକ ନେଟୱର୍କ ସହ ଜଡ଼ିତ ରହି ଅନେକ ସଂଗୀନ ମାମଲାରେ ପୋଲିସ ଆଖିରେ ଧୂଳି ଦେଇ ବୁଲୁଥିଲେ। ଏହି ଏନକାଉଣ୍ଟର ଘଟଣାକୁ ନେଇ ବାହାଦୂରଗଡ଼ର ସଦର ଥାନାରେ ଏକ ନୂଆ ମାମଲା ରୁଜୁ କରାଯାଇଛି ଏବଂ ଆଇନଗତ ପ୍ରକ୍ରିୟା ଅନୁଯାୟୀ ଏହାର ପରବର୍ତ୍ତୀ ତଦନ୍ତ ଜାରି ରହିଛି।
