13 hours ago
2
ARTICLE AD BOX
କିଭ୍: ବୁଧବାର ୟୁକ୍ରେନର ଦକ୍ଷିଣାଞ୍ଚଳରେ ଏକ ଯାତ୍ରୀବାହୀ ବସ୍ ଓ ଟ୍ରେନ୍କୁ ଲକ୍ଷ୍ୟ କରି ରୁଷ ପକ୍ଷରୁ କରାଯାଇଥିବା ଭୟଙ୍କର ଡ୍ରୋନ୍ ଆକ୍ରମଣରେ ୫ ଜଣଙ୍କର ମୃତ୍ୟୁ ଘଟିଥିବା ବେଳେ ଏକାଧିକ ଯାତ୍ରୀ ଆହତ ହୋଇଛନ୍ତି। ୟୁକ୍ରେନର ପରିବହନ ବ୍ୟବସ୍ଥା ଓ ଆର୍ଥିକ ଭିତ୍ତିଭୂମିକୁ ପଙ୍ଗୁ କରିବା ପାଇଁ ମସ୍କୋ ନିଜର ଆକ୍ରମଣକୁ ଆହୁରି ତୀବ୍ର କରିଥିବା ସ୍ଥାନୀୟ ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ସବୁଠାରୁ ମାରାତ୍ମକ ଆକ୍ରମଣ ନିକୋପୋଲ୍ ସହର ନିକଟରେ ଏକ ଯାତ୍ରୀବାହୀ ବସ୍ ଉପରେ ହୋଇଛି, ଯେଉଁଥିରେ ୪ ଜଣ ପୁରୁଷ ଓ ଜଣେ ମହିଳାଙ୍କ ସମେତ ୫ ଜଣଙ୍କର ପ୍ରାଣହାନି ଘଟିଛି। ଡନିପ୍ରୋପେଟ୍ରୋଭସ୍କ ଆଞ୍ଚଳିକ ଗଭର୍ଣ୍ଣର ଓଲେକ୍ସାଣ୍ଡର ହାଞ୍ଜା ଏହି ଆକ୍ରମଣରେ ୭ ଜଣ ଆହତ ହୋଇଥିବା ସ୍ପଷ୍ଟ କରିଛନ୍ତି। ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏହାକୁ ଏକ ବର୍ବରତା ବୋଲି କହିବା ସହ ରୁଷ ବିରୋଧରେ କଟକଣା କଡ଼ାକଡ଼ି କରିବାକୁ ଆମେରିକା ଓ ଇଉରୋପୀୟ ଦେଶଗୁଡ଼ିକୁ ଆହ୍ୱାନ ଦେଇଛନ୍ତି।
ଟ୍ରେନ୍ ଉପରେ ମଧ୍ୟ ଡ୍ରୋନ୍ ଆକ୍ରମଣ
ଅନ୍ୟପଟେ ଦକ୍ଷିଣ ମାଇକୋଲେଭ୍ ଅଞ୍ଚଳରେ ଏକ ଯାତ୍ରୀବାହୀ ଟ୍ରେନ୍ ଉପରେ ମଧ୍ୟ ଡ୍ରୋନ୍ ଆକ୍ରମଣ ହୋଇଥିଲା। ତେବେ ତୁରନ୍ତ ୧୬୮ ଜଣ ଯାତ୍ରୀ ଓ କର୍ମଚାରୀଙ୍କୁ ସୁରକ୍ଷିତ ସ୍ଥାନାନ୍ତର କରାଯାଇଥିବାରୁ ଏକ ବଡ଼ ଦୁର୍ଘଟଣା ଏଡ଼ାଇ ଯାଇଛି। ପୋଲାଣ୍ଡ ସୀମାନ୍ତ କୋଭେଲରେ ମଧ୍ୟ ରେଳ ଲୋକୋମୋଟିଭ୍ ଉପରେ ଆକ୍ରମଣ ହୋଇଥିବା ଜଣାପଡ଼ିଛି। ୟୁକ୍ରେନ୍ ବୈଦେଶିକ ମନ୍ତ୍ରୀ ଆନ୍ଦ୍ରି ସିବିହା ଅଭିଯୋଗ କରିଛନ୍ତି ଯେ, ସାଧାରଣ ନାଗରିକଙ୍କ ଆବାଗମନ ଓ ଦେଶର ଅର୍ଥନୀତିକୁ ସମ୍ପୂର୍ଣ୍ଣ ଅଚଳ କରିବା ପାଇଁ ରୁଷିଆ ସେନା ଯୋଜନାବଦ୍ଧ ଭାବେ ରେଳସେବା ଓ ପରିବହନ ବ୍ୟବସ୍ଥାକୁ ଟାର୍ଗେଟ୍ କରୁଛି।
